Festîvala Cinîyan a Zîlane ya 18ine ya ke serkêşîya YJK-E de ameye organîzekerdene bajarê Duiburgî yê Almanya de bi şîarê “Bi Jin, Jiyan, Azadî, Ber Bi Soreşa Jinê” ameye kerdene. Festîvale emser cinîyê ke Têkoşînê Azadîye yê Kurdan de menga hezîrane de şehîd bîyî, înan rê ameye dîyarîkerdene.

Bi hezaran cinîyê ke bi kincanê xo yê neteweyî tewrê festîvale bîyî warê festîvale bi sloganan û tîlîlîyan açarna şayîye. Stantdê kitab, kincan û çî-mîyê  neteweyîyan saf eleqe ante xo ser.  Festîvale de sahne bi fotografanê şehîdan ê cinîyan ê serkêşan ê PKKyî ame xemilnayene û sloganê sey“Jin Jiyan Azadî”, “Şehîd Namirin” û “Bijî Serok Apo” ameyî vatene. Programê festîvale bi watişê marşa Ey Raqîpî û rêzgirewtişî ame destpêkerdene û bi deyîranê koreyê Zarokên Rojê dewam kerd.

Vervatoxa YJK-E  Kezban Dogan qiseykerdişêk kerd. Dogane nê vatî: ''Festîvala Zîlane têna  festîvalêka sîyasîye û kulturkî nîya, na festîvale sey parçeyêkê hemleya Abdullah Ocalanî Azadîye yena kerdene. Têkoşînê cinîyan ke serkêşîya cinîyan ê kurdan de dinya de berz beno rengê xo felsefeya Abdullah Ocalanî ra geno.  Cinîyî hinî cuyeyêka newî înşa kenê.''

KJKyî mesajê xo de vat: ''Ganî ma xebatanê semedê azadîya Rayber Apoyî bikerê merkezê cuya xo û semedê cinîyan yew sîstem û waranê cuyeya azade înşa bikerê.''

Fermandara YJŞyî Hêza Şengalî zî têkoşînê gerîlayan selam kerd û vat: ''2014 de xeta îxanetî komelê êzdîyan bêwayîr û bêpawitiş verda. Komelê êzidîyan bêpawitişî dişmenî dir rî bi rî mend. Koyanê Kurdîstanî ra gerîlayê HPG û YJA Starî vazdayî gazîya Şingalî. Netîceya xoverdayîş û têkoşînî hêzê xopawitişî yê Şingalî YBŞ û YJŞ ameyî ronayene ke ewro şarê Şingalî pawenê. Ewro xeta xoverdayîşî ya Zîlane de şarê êzidîyan xo paweno û cuye înşa keno.''

Badê qiseykerdişanê bînan festîvale bi muzîk û govende dewam kerd. Cinîyan bi coşî govende girewte. Festîvale bi slogananê “Jin Jiyan Azadî” û “Bijî Serok Apo” qedîyaye.