Festîvala Cinîyan a Zîlane ya ke kombîyayîşê cinîyan ê kurdîstanijan o tewr pîl o û her serre Almanya de yena kerdene, emser reya 17. şaristanê Gelsenkîrchenî de do bêra serûberkerdene.

Festîvala ke hetê YJK-E ra yena serûberkerdene, emser do dîyarîya vîrameyîşê Evîne Goyî (Emîne Kara) bêra kerdene. Festîvale de derheqê felsefeya 'Jin, Jiyan, Azadî' de panelêk do bêro kerdene, berhemê destan ê cinîyan standan de bişinasîyê, pêramotişê cinîyan bêrê mojnayene û seba domanan warê kaykerdişî bêrê ronayene.

Festîvale de Jin Ma, Mizgîn Tahir, Kevana Zêrîn, Eyleme Aktaş, Besere Şahîn û Fîrmeske do vejîyê sehne ser.

Komîteya Amadekarîye ya Festîvale ra endamanê TJK-E Jînda Denîz û Aytene Kaplan derheqê amadekarîyanê xo de ANFyî rê qisey kerd û venga pêro cinîyan da ke wa tewrê festîvale bibê.

Jînda Denîz bale ante ser ke Festîvala Zîlane festîvalêka mîyanneteweyî ya û vat: ''Amadekarîyê festîvale qedîyayê. Ma armanc kenê ke festîvale de hêzê cinîyan bimojnê. Azadîya cinîyan û şorişê cinîyan do serkêşîya 'jin, jiyan, azadî' de bêrê caardene. Coka festîvale do hem biba mesajêkî hem zî biba vengdayîşêkî. Ma çend kom bibê, çend xo rêxistin bikerê, çend zêde bibê hende do xurt bibê, îşxalkerî zî qels bibê. Coka ganî her kes tewrê festîvale bibo.''

Aytene Kaplan vat: ''Ma prosesêko giran xo pey de verda. Rojhelat de qetilkerdişê Jîna Emînî, Qirkerdişê Parisî yo Diyîn, erdlerzê 6ê Sibate... Bi taybetî xoverdayîşê Rojhelatê Kurdîstanî bi felsefeya 'Jin, Jiyan, Azadî' global bi. Festîvala Zîlane ya 17. reyde ma do rêxistinîya xo, têkoşînê xo, hêzê xo yê yewbîyayî bimojnê û komanê cinîyan ê cîyayan de bêrê têhet. Ma do têkoşînê xo yê hemparî, felsefeya xo ya 'jin, jiyan, azadî' nîqaş bikerê.''