Vizêr bajarê Gelsenkirchenî yê Almanya de bi slogana “Jin Jiyan Azadî Ji Kurdistan e bi Cîhanê ve” Festîvala Zîlane ya 17. Ameye kerdene. Festîvale de mesajê xurtkerdişê têkoşîn û xoverdayîşî ameyî dayene.

Festîvala ke Evîne Goyî rê ameye dîyarîkerdene  ke 23ê kanûne de qirkerdişê Parisî de şehîde bîye, bi hezaran cinîyê kurdan bi kincanê xo yê neteweyîyan tewrê ci bîyî. Festîvala de ya ke pîya bi cinîyan ê kurdan dostê kurdan zî tewrê ci bîyî, sloganê ‘Jin Jiyan Azadi’, ‘Şehîd namirin’ ameyî vatene. Standanê kitaban û kincanê neteweyîyan zaf eleqe ante xo ser. Warê festîvale bi fotografanê şehîdan ê cinîyan xemilîya û flamayê sîmgeyê têkoşînê cinîyan ameyî daliqnayene. Fotograrê şehîde Evîne Goyî sehne de ame daliqnayene.

Badê panelê bi nameye Şorişê cinîyan û destkewteyê cinîyan ê kurdan programê sehneyî bi marşê Ey Raqîp û deqayêk rêzgirewtişî dest pêkerd.

Aktîvîsta YJK-E Aytene Kaplan qiseykerdişo kilmek kerd. Kaplane vat: “Şorişê Jin Jiyan Azadî yo ke şehîdan ma rê verdayo ewro heme dinya ra vila bîyo. Cinîyan ê kurdan bi têkoşînî xeylêk destkewteyî fînayî dest. Semedê pawitişê nê destkewteyan têkoşîn do tim dewam bikero.”

Dima ra grûba muzîkî ya  Kevana Zerînî û hunermende Şeyda vejîyyaî sehne û deyîrî vatî.

Festîvale de mesajê KJKyî ame wendene. KJKyî festîvale bi ruhê xoverdayîşî yê koyan silam kerd û veng da ke wa her kes xeta serkewtişî ya Rayberê Şarê Kurdî Abdullah Ocalanî de paştî bido xoverdayîşê gerîlayan û têkoşînê cinîyan xurtêr bikero.

Qiseykerdişê bi nameye Paştdayîşê Cinîyan ê Ewropa de bale ameye antene têkoşînê hemparî ser û ame vatene ke cinîyî pîya hêzdar ê.

Festîvale bi deyîranê hunermende Eyleme Aktaş, Beser Şahîn û grûba muzîkî ya Jin Ma qedîyaye.