Dewa El-Deba qeraxê royê Firatî de, sînorê şaristenekê Sirînî de, dewêka qickeke ya zergûn a. Dewe Vakurê Sûrîye de sey dewa eşîra Emîratî, ke eşîrêka pîle ya Ereban a, yena zanayene. Nê erdan de formê eşîrperwerîye hewna zî xurt o.  

Dewa El-Deba zî sey xeylî dewanê bînan bi xozaya xo ya weşike, bi daranê xo yê zeytûn û hinaran û xeylî daranê meyweyan ê bînan wayîrê weşikîyêka namdare ya.

Seva ke dewe qeraxê royê Firatî de ya karê masegêrîye çimeyo sereke yê şarê dewe yo. 

Gama karê ‚masegêrîye‘ yeno vatene sey zafê karan îdrakê cimatî de sey karêkê camêrdan yeno vîrî. Labelê Emşê Mihemeda 50 serrî, pîya bi mêrdeyê xo 33 serrî yo nê gureyî kena.

Emşêya ke 3 lajê ci vejîyayê teberê welatî û keynayê ci zî zewejîyayê û bîyê cîya, rixmê çokanê xo yê bi romatîzmayan de seva debarîya xo pîya bi mêrdeyê xo masegêrî kena.

Pêroyê serwetê Emşê û mêrdeyê ci sendalan înan û yew motorsiklêt a. Nê wareyî de ke çiman ra dûrî yo ê zî sey her kesî wazenê ke domanê înan perwerdeyêkê rindî bigîrê, dewa înan rê xizmet bêro kerdene.  

Goreyê Emşê û mêrdeyê ci maseyê ke royî de bî bîyê kemî. Sebebê nê zî tayê masegêrî bi teqebaran û bi rayîrê elektrîk dayîşî seyd kenê. 

Dewa înan El-Deba zî sey xeylî dewan dimayê viraştişê awbendê Tişrînî ra binê awe de menda. Zafaneyê dewe binê awe de mendo, la înan dewe terk nêkerda û hewna zî dewe de ciwîyenê.

Û eke rojêk, vejîyayîşê rojî de rayîrê şima bikewo hetê Sirînî yê nizdê royê Firatî û şima ûca cinîyêka masegêre bivînê bizanê ke a Emşê ya.