Endama Konseya Rayberdişî ya KCK’yî Besta Firate bale ante serê grevanê vêşanîye yê zîndananê Tirkîya, yê tepişteyanê PKK’yî û PAJK’îyan û vat ê peyrewê a şope yê ke 14’ê Temmuze ra heta ewro PKK de dewam kena. Firate vat, “Vizêr embaz Mazlûm Doganî vat, ‘Xoverdayîş cuye ya’, nika zî Leyla Guvene vana, ‘Xoverdayîş xurt keno, pasîfîzm kişeno’ û aye ard ziwan ke ê peyrewê na şope û mîrasgirewtoxê nê xoverdayîşî yê. Xoverdayîşê tepişteyan dest pêkerdo, la linga ci ya cimatkîye, linga ku naye bi pêroyî açarno xoverdayîşî bi temamî role xo nêana ca. Çalakîyê heta nikayî dewleta Tirkî serûbin kerde. Cimatî de hayabîyayîşêk viraşt û xo resna hemeyê dinya. La nê hewna nêresayê a merheleye ke tecrîdî bişiknê.” 

ÇALAKÎYÊ PAŞTDARÎYE KEMÎ MENDÎ

Firate derheqê qerarê tepişteyan ê ke zîndanan de bi grevê vêşanîye 1’ê Adare de dayê destpêkerdene û bi nê hawayî hemeyê zîndanan de vila kerdî zî vat, “Embazê ke zîndanan de yê dî ke çalakîyê teberî kemî yê. Na çalakîya xo ya ke seba wedaritişê tecrîdî dabî destpêkerdene seba ke berê sere serkêşîye kerde, tena çîyo ke înan dest de yo cuya înan a û înan cuya xo eşta werte. No seba şarê ma yê teberî heman wextî de cewabêk o ke eşkenê xeylî çîyan bikerê.”

Firate ard ziwan ke nê prosesî de paştîdayîş, biheqdîyayîşê çalakîye qîm nêkeno, vateyî manaya xo kerda vîndî, her kes herinda ke cayê xo de bibo paştîdayox ganî mîyanê xoverdayîşî de bo û rolê xo bi ca bîyaro. Firate vat “Tirkîya zî tede, heqê qiseykerdişî, cuye, xebate ya çewî nêmendo. Ewro eke ma vanê tecrîd serê her kesî de esto ganî bibê nê xoverdayîşî de ê zî ca bigîrê.” 

GUREYÊ PÎL KEWENO DOŞÊ KEYEYANÊ TEPIŞTEYAN SER

Firate derheqê polîtîkayanê dewlete yê seba şikitişê îradeyê zîndanan de vat hêrişî ne reya ewilêne yê, ne zî newe yê, verê xoverdayîşî zî qedexeyo her tewir yê pêvînayîşî, îşkence û hêrişê serê heqanê şexsîyan de estbî û nika zî gama ke dewlete muracatê nê metodan kena ê şaş nêmanenê. Firate wina dewam kerd: “La ganî bi nê rind bizanê, ê çende hêrişan bikerê do xoverdayîşê tepişteyan zî hende bibo xurt. Xoverdayîşê înan pêgirewteyîya înan a Rayber Apoyî ra û qerardarîya înan ra yeno. Rayber Apo seba ma xeta sûr a. Weşîya Rayber Apoyî, şertê êyê xebate, cuye û felsefeya ê seba ma meseleyê mendiş û nêmendişî yo.”

Firate vat hêriş û destbendkerdişê Ewropa yê serê çalakîyan bi hawayêkê eşkerayî hemkarîya bi Tirkîya û Ewropa ramojnenê û Ewropa bi nê nizdbîyayîşê xo ramojnena ke ê paştî danê tecrîdî. Firate vat, “Tu umîd û bendewarîyê ma welatanê Ewropa ra çinê, sazîyanê mîyanneteweyîyan ra çinê. Umîd û bendewarîyê ma yê tekaneyî nizdbîyayîşê şarê ma yo. Ewropa de bi mîlyonan Kurdî estê. Bendewarîya ma nizdbîyayîşê înan o. Bitaybetî zî ganî keyeyê tepişteyan û çalakwanan serkêşîye bikerê. Gureyêko muhîm keweno serê doşanê mayanê aşitîye. Xora zereyê xoverdayîşî de yê, mucadele danê, serkêşê mucadeleyê cinîyan ê, la ganî ê bi mîlyonan tewrê nê xoverdayîşî bikerê. Qasê organîzebîyayîşê xo ganî organize zî bikerê.”