Partîya Çep a Keske û Partîya Demokratîke ya Şaran (HDP) vizêr derheqê 'Konferansê Cinîyan ê Pîlî' de yo ke do bikerê, kombîyayîşê hazirîye kerd.

Kombîyayîşo ke Taksim de otêlêke de ame kerdene Meclîsê Cinîyan ê HDK, HDP û Partîya Çep a Keske, wekîlî, merdimê tepişteyan û xeylêk kesî tewrê ci bîyî. Kombîyayîş bi tîlîlîyan, govende û slogana “Jin, jiyan, azadî”  dest pêkerd û dima Hemsereka HDPyî ya Îstanbulî Îlknure Birola qiseykerdişê akerdişî kerd.

Îlknure vat: ''Ma seba ke newera virar şirê pêrodayîş û xoverdayîşî ra tîya de yê.  Dayîkê ke tim pê laçikanê xo yê sipîyan vera faşîzmî xover danê, cinîyê kedkarê ke  vera talankerdişê xoza, sîyasetê qirkerdişî têkoşînê ekolojîkî kenê, ma pîya bi înan tîya de yê. Ma sey cinîyanê ke  virar şinê bawerîya xora, azadîye û seycîyeyî pawenê û eşkenê dinya herinda ci ra bileqinenê tîya de yê.

HDP partîya cinîyan a.  Her kombîyayîşê ma, her qala ma, her gama ke ma erzenê tesîrê têkoşînê polîtîkî yê komelî keno. Îqtîdaro faşîst bi hêrişan keno ke şarî îzole bikero. No zî sere de rejîmê tecrîdî yo ke Îmrali de vera Birêz Abdullah Ocalanî yeno rayraberde. Tecrîd îzolasyono şenik nîyo, nameyê rejîmêk o  ke ameyo ronayene û no tecrîd  heme dezgehanê komelî de vila beno. Tecrîd têna zîndanan de nîyo. Unîversîte û dezgehî zî binê tecrîdî de yê. Coka ganî têkoşîn bi tecrîdê Îmraliyî bêro destpêkerdene. Tecrîd rojdemê ma yo verên o. Ma do bi pîlkerdişê paştdayîşê cinîyan vera serdestîya camêrdan têkoşînî xurtêr bikerê.''

Vervatoxa Partîya Çep a Keske ya Îstanbulî Besere Çelik zî ard ziwan ke têhetameyîşê cinîyan ê têkoşeran vera polîtîkayanê îqtîdarî cewabêko pîl o.

Badê qiseykerdişan kombîyayîş çapemenîye rê qefilnaye dewam kerd.