Programê pîrozkerdişî yê 8’ê Adare yê YJA Starî, Warê Pawitişî yê Medya de ame viraştene. Fermandaranê Qerargehê Merkezî yê YJA Starî ra Zozan Çewlîke, endama Konseya Leşkerî Şerda Mazlum Gabare, fermandaran ra Peyman Bagoke, Amara Gulîstane û bi desan gerîllayê YJA Starî beşdarê programî bîyî.

WISARÊ XOVERDAYÎŞÎ

Zozan Çewlîke qiseykerdişê xo de va “ No wisar bi serkêşîya Leyla Guvene bîyo wisarê xoverdayîşî” û wina dewam kerd:  “Ma hêzê YJA Starî serê de 8’ê Adare yê Rayber Apoyî, Leyla Guvene, xoverdayoxanê Mexmur, Ewropa, Hewlêr û pêro hepisxaneyanê Tirkîya pîroz kenê. Ma xoverdayîşê înan silam kenê û soz danê ke heta peynîyê ma do înan het de bê û wayîr bivejîyê.

Reyna se ke yeno zanayene, 40 serre de xeylî hevalanê ma û mucadeleyê cinîyan ma rê  mîrasêko pîl verda. Şexsê Sara, Sema Yuce, Arîn, Delal û Armancan de, reyna embazê ma Atakan, Fîkrî Baygeldî û Zinarî yê ke vuryayîşê camêrdîye de serkêşîye kerda de, ma pêro şehîdanê têgarayîşê azadîye bi hurmet yad kenê. Şexsê dayîkanê şehîdan de 8’ê Adare Roja Cinîyan yê pêro dayîkan pîroz kenê. Reyna ma Roja Cinîyan a hevalanê xo yê Warê Pawitişî yê Medyayî yê YPJ, YJŞ, HPJ’yî pîroz kenê û serkewtiş wazenê.

M abi serkêşîya Leyla Guvene, meydanan de, koyan de, bajar û deştan de, bi wisarê neweyî,  xoverdayîşê cinîyan rê şahadîye kenê. Sîstemê camêrdîye yê 5 hezar serreyî, cinî û komelî qirkerdê û ewro ma cinîyî vera nê sîstemî xo ver danê û mucadeleyî kenê berz. Ma zanê ke no wisar sey wisaranê binan nîyo. Faşîzmo ke Erdogan û Bahçelî ci rê şerkêşîye kenê do bi xoverdayîşê cinîyan birijîyo. Seba cinîyan û şaran do cuyêka neweye bêro înşakerdene.

MA DO HETA PEYNÎYE XO VER BIDÊ

Ma sey YJA Star, Rayberîye û pêro şarî wextêko îstîsnaî ra derbaz benê. Ma pêro baş zanê ke serra 2019’î do asan derbaz nêbo. Ma hêzê YJA Starî, serkêşîye bikê û mucadeleyî hîna aver berê û xoverdayîşî  bikê pêt.

No çarçewa de, bi taybetî zî seba ke tecrîdê serê Rayber Ocalanî bêro şikitene, seba ke cinî û şarî hîna bibê azad, çi wezîfe keweno ma het, ma do bîyarê ca. Ma do bi gerîllatîye ya moderne, şerê nê demî de rolêko muhîm bigîrê xo ser. Ma do bi xêza Zilanan serkêşîye bikerê û zîhnîyetê serdestîye birijnê.”