Gerîlayê YJA Starî yê ke vera hêrişê îşxalî yê dewleta tirke çalakîyanê serkewteyan kenê bi wesîleya komployê vera  cinîya şorişgêre Sara (Sakîne Cansiz) ANFyî rê qisey kerd.  Gerîlayanê ke Hemleya Cengê Xebûrî de ca girewt vat ê do serra 2022yî de têkoşînî xo newe bikerê û qesasê hemrayanê xo bigêrê.

 Gerîla Bêrîvane Cûdî ard ziwan ke a bi tesîrê şehîde Sara vejîyaya koyanê Kurdîstanî û vat: ''Ez erbêka şeddadeyij a. Bado ke mi embazî nas kerdî, cigêrayîşê mi dest pêkerd. O wext  vatişê Rayberîye 'Her kes koyan ra bêro war zî ganî cinîyî çirey koyan ra merê war' û vatişê embaze Sara 'Cuya mi tim pêrodayîş bî' bale mi antebî. Wina mi verê xo da koyan.  Gama ke mi embaze Sara wend, mi ferq kerd ke karekterêko xoverdayox û têkoşer afernayo. Nê semedî ra kitabê 'Cuya mi tim pêrodayîş bî'  cuya mi bedilnaye.  Mi vera xo şerêko pîl da. Merdim çend xo dir şer bikero wina sekewtişanê pîlan fîneno dest û semedê kesanê dormeyê ci zî beno hêzêk. Seba ke ma biresê merhaleya cinîya azade ganî ma cuya embaze Sara sey nimûne bigêrê û felsefeya azadîye ci ra bawer bikerê. Embaze Sara xeta sekewtişî ya.  Ma do na xete de bi îdîaya pîle cinîyan biresnê sekewtişî. Embaze Sara bi rûhê xoverdayîşî û fîkranê xo  do tim ma dir biciwîyo.''

Gerîla Rosîda zî ard ziwan ke vindertişo sereberz ê şehîde Sara yê vera dişmenî hem semedê înan hem zî semedê komelî nimûneyêka pîl a û vat: ''No eslê xo de vindertişê cinîya azade yo. Ma vindertiş û xoverdayîşê embaze Sara sey nimûne genê. Girêdayîşê ci yê Rayberîye û cuya ci merdiman ser o zaf tesîr keno. Vindertiş û têkoşînê ci dişmenî ser o zî tesîr keno. Dişmen nêeşkenayêne verê  aye bigêro. Coka Qirkerdişê Parisî kerd.  Embaze Sara semedê têgêrayîşî keda pîle daye. Kitabê ke xo dima verdayî ma bedilnenê. Pê wendişê cuya aye ma zaf çî musenê û ver bi azadîye gaman erzenê. Çunke ê şerêkê raştî û têkoşînêkê biheybetî musnenê.  Nika ma şerê estbîyayîş û çînbîyayîşî kenê.  Dişmen ferqê hêzê gerîlayan de yo. Seba ke nêeşkeno têkoşînî gerîlayan bişikno metodanê bêehleqan fîneno dewre û çekanê kîmyewîyan şuxulneno.  Ma şexse embeze Sara de do qesasê heme şehîdanê xo bîgêrê. Ma do têkoşînê xo pîlêr bikerê û ser bikewê.''