Rojhelatê Kurdîstanî û Îran de protestoyanê ke vera qetilkerdişê Jîna Emînî dest pêkerd yew aşme xo dima verdaye. Hemsereka KODARî Gulane Fehîm serhildanê şaran ê vera rejîmê Îranî ANFyî rê ercna.

''Gulane Fehîm ard ziwan ke serhildano ke heme Îranî de ame vilakerdene netîceyê holî vetê werte û vat: ''Cinîyan ê ma tewirêko sereberz mojna ke ma pawenê ke ê nê tewirî xurtêr bikerê. No têkoşîno ke cinîyî serkêşîya ci kenê Rojhelat û Îran de cuyeyêka bimana newe ra ganî kerde. Slogana 'Jin jiyan azadî' ya ke çalakîyan de yena vatene yew felsefe, îdeolojî yew cuya newî îfade kena. Her çiqas cinîyê serkêşê têkoşînî bê zî  no waştişê heme komelî yo û coka têkoşîn çend şino xurtêr beno.''

Gulane Fehîm çekuya ''Heta cinî azad mebo, komelê nêeşkeno bibo azad'' ê Rayberê Şarê Kurdî Abdullah Ocalanî ard vîrî û vat: ''Inkey Rojhelat û Îran de zî no yeno esasgirewtene.  Senî ke serranê 2010-2011î de wisarê ereban o ke rejîmê welatanê ereban serûbin kerdî, qewimîya inkey zî eynî çî Rojhelat û Îran de beno. Têkoşînê welatanê ereban de şarî tam nêeşkayî waştişanê xo bifînê dest. Inkey Rojhelat de sebebê serhildanî azadîye ya. Verî zî tîya serewdaritişî ameyî kerdene û verê înan ame girewtene. Inkey  heme şarî azadîye wazenê. Waştişê şaran yew o. Şarê ma ganî paştê xo medo hêzanê xerîban, pê hêzê xo payra bimano û xo bipawo. Xora şarê ma çirey hetê şîdetî de nîyo. Eke Îran wazeno mesele çareser bikero ganî goş bido waştişanê şaran.  Têkoşînê şarê ma têna Rojhelat û Îran de nê do heme herême de verê serkewtişanê pîlan abikero.''