Fermandara Akademîyanê Apollonî yê HPGyî Amara Gulîstane tewrê programê Stêrk TVyî bîye qala vîrameyîşanê xo yê bi Sakîne Cansiz kerde.

Di Xeyalanê Mi Ra Yewe Bî…

Gulîstane vat: ‘‘Seke ez ameya koyan di xeyalê mi estî; mi waştêne Rayberîye û embaza Sara bivînê. Seke nameyê Sara vajîyeno têkoşîn yeno mi vîr. Bêşik o ke Sara bi vateyêk nîna qalekerdene. Sara hem xo hem zî embazê xo afernayî. Tewirê xo de bi hezaran cinîyî kiriştî û bi nameyê înan bîyî qîrayîşêk.  Kulture hûmayîye newe ra kerde ganî û şexsê xo de ma rê newe ra da ciwîyayene. Têna rayêk aye vînayîş û verarepiraşîyayîş xeyalê mi yo tewr gird bi. Wexto ke ez 2011 de zîndan ra vejîyaya koyan de mi aya dîye. Zîndan de xoverdayîşê embaze Sara yê zîndanê Amedî çimeyê ûmidê mi bi. Ez hem koyan rê hem zî embaze Sara rê hesret mendebîya. Gama ke mi her di zî dîyî mi wina yew mana vete: ‘‘ Ko Sara bi Sara zî ko bî‘‘.

Vînayîşo Verên

Gulîstane derheqê vînayîşê Sakîne Cansiz de nê vat: ‘‘ Şewe bî, ma semedê zîyaretkerdişê embazan şîybî warêkê bînî. Tarî bi. Va embazî ameyî ma yew bi yew virare şîyene înan ra. Tewr peynî de embazêka cinîye pîta virare şîye mi ra. Mi hîss kerd û xo zere de vat ‘na hiheqeq embaze Sara ya‘ çilayî bîyî a tewr kuncik de roniştêne.  Yew bi yew ewnîyayêne ma ra. Taybetîyanê aye yê tewr rindan ra yew zî no bi. Gama ke ewnîyayêne hemrayêka/ê xora seke newe bivîne/o, wina ewnîyayêne ci ra. Ewnîyayî mi ra û va ‘ez vana qey embazaka zîndan ra vejîyaya ti ya‘ ez eceb menda. Çunku mi newe dîyêne. Mi va ti çara fehm kerd vat ‘kesa/o ke zîndan de menda/o fehm keno‘. A hele semedê mi helêka za cîya bî. Hela ke çew virare şîyêne aye ra dejê çewî bîyêne weş.  Hema ke çew çîyêk nêvato aye fehmkerdene û dayene hîsskerdene. Şansê mi  estbi ke mi embaze Sara dî aye de qisey kerd. Hela ke aye qisey kerdêne dîyayene çewî ra û weşkerdene.‘‘

Kulturê Xoverdayîşî yê Embeze Sara Vila Beno

Gulîstane wina dewam kerd: ‘‘Embaze Sara fikrê Rayberîye ma ardêne ca.  Kulturê xoverdayîşî yê embaze Sara çend şino vila beno.  Ewro heme cinîyê xoverdayîxî hêzê xo kulturê xoverdayîşê embeze Sara ra gênê. Cinîya azade ke tim qala ci yena kerdene a embaze Sara bi xo bî. Rayberîye vano, ‘ganî her wezîfe, her gure û her cayê cuye de rengê cinîyan û cinîyî estbê‘. Embeze Sara embeza verên a ke wayîrê nê vatişê Rayberîye vejîyaye.

Sara Rîyê Dêrsimî yo Xoverdayox a

Xora karekterê Sara de rolê herra Dêrsimî zî zaf gird o. Di rîyê Dêrsimî estî yew oyo ke ameyo qirkerdene û xo nasnêkeno. O bînî zî tim xoverdayîş o. Embeze Sara rîyê Dêrsimî yo ke çok nêdano ya. A babeta Dêrsimî sey qederî nêvînena şina ser û tim ewnîyêna vernîya xo ra. Embeze Sara temsîlkarê rîyê Dêrsimî yê xoverdayoxî ya. Embeze Sara hêzê qesasgirewtişî ya.‘‘

Xoverdayîş Azad Keno

Fermandara Akademîyanê Apollonî yê HPGyî Amara Gulîstane qiseykerdişê xo wina qedîna: ‘‘Nika çar perçeyê welatî de hêrişê dişmenî esto. Rayberîya ma kiştişê emebeze Sara sey komplo name kerd. Wayîrvejîyayîşê tewirê embeze Sara wayîrvejîyayîşê Rayberîye û azadîye yo. Ganî ma naye zaf hole bizanê israrkerdişê têkoşînî rayîrê azadîyê akeno, ma azad keno. Bi tewirê embeze Sara û Rayberîye têgêrayîş do ma azad bikero. Sey Sara ciwîyayîş xoverdayîş o. Xoverdayîş azad keno.‘‘