HDP Depe de şarî reyde ame têhet

Hemhetkarê Hemserekanê HDPyî Tuncer Bakirhan û Serekwekîla Grûba HDPyî Merale Daniş Beştaş qezaya Depe ya Xarpêtî de şarî reyde ameyî têhet. Bakirhanî kombîyayîş de vera hêrişanê nîjadperestan seba têkoşînê hemparî veng da.

Rêxistina HDPyî çarçewa kampanyaya 'Ma HDP yê her ca de yê' qezaya Depe ya Xarpêtî de şarî reyde kom bîyî. Hemhetkarê Hemserekanê HDPyî Tuncer Bakirhan û Serekwekîla Grûba HDPyî Merale Daniş Beştaş, îdarekar û endamê HDPyî yê Çewlîg, Dêrsim û Xarpêtî zî tewrê kombîyayîşî bîyî.

Kombîyayîş de verî Bakirhanî qisey kerd û ard ziwan ke îqtîdar nêeşkeno welatî îdare bikero. Bakirhanî qirkerdişê keyeyê Dedeogullariyî vist vîrî û da zanayene ke îqtîdar nê hêrişanê nîjadperestan geş keno. Bakirhanî vat: ''Îqtîdar nê hêrişan ceza nêkeno. La ma pê têkoşînê hemparî eşkenê verê nê hêrişan bigêrê.''

Merale Daniş Beştaş verî qurbanê Fermanê 73. yad kerdî.  Beştaşe zî eşkera kerd ke mesuldarê cînayetê vera cinîyan, şewatan û pêro bêhuqûqîyan iqtîdar o. Beştaşe bale ante dewaya qefilnayîşê HDPyî ser û vat: ''Ê sûcanê xo pê hêrişê vera HDPyî nimnenê. HDP şar o coka şima nêeşkenê partîya ma biqefilnê.''

Beştaşe grevê vêşanîye yê tepişteyan vist vîrî û vat: ''Zîndanî bîyê cayê kerdişanê xiraban, mergî.  Tecrîdê vera Birêz Abdullah Ocalanî sîyasî yo.''

Beştaşe pare kerd ke hema zî kiştoxê keyeyê Dedeogullariyî nêame dîyene û vat: ''Welat de hemwelatîyî tweetêkî ra semed cade tepişîyenê. La kiştoxê kurdî vera dîyenê. ''

Aktîvîte de vera sloganê sey 'HDP şar o', 'Cinîye, Cuye, Azadîye' ameyî vatene. Aktîvîte pê deyîranê hunermend Zinar Sozdarî qedîyaye.