Platformê Cinîyan ê Dîcle yê Amedî (DAKAP) vera hêrişanê cînsîyan ê serê domanan ê terîqat û cematan Meydanê Şêx Seîdî de çalakîya 'xeleka more' kerde. Hemsereka HDPyî ya Amedî Gulîstane Atasoy û xeylêk cinîyî tewrê çalakîye bîyî. Çalakîye de sloganê sey 'Domanî bêvenf nêmanê, şima zî nêmanê' û 'Cayê domanan dibistan ê' ameyî vatene.

Hemsereka HDPyî ya Amedî Atasoye çalakîye de vist vîrî ke Serekê Weqfa Hîranurî ya Cematê Îsmaîl Axayî Yusuf Zîya Gumuşelî kênaya xo ya 6 serre dabî zewijnayene û Wezîra Polîtîkayanê Keye û Komelî zî vera rewşêka winayêne bêveng menda. Atasoye îfade kerd ke hêrişê cînsî yê vera domanan polîtîk ê. Atasoye ard ziwan ke domanî teslîmê tarîqat û cematan yenê kerdene û nê cayan de zî raştê hêrişanê cînsîyan yenê.

Atasoye vat: ''Bedelê ci se beno wa bibo ma do ameyoxê domanan teslîmê îqtîdar, terîqat û cematan nêkerê. Ma sey cinîyan bawerîya mehkeme û hakîman nêkenê. Cinîyî her ca de rêxistinîya xo pîlêr bikerê û wayîrê heqanê xo vejîyê. Ne şima ne zî wezîrê şima nêeşkenê verê ma bigêrê. Ma bi şîarê 'Jin, jiyan, azadî' vera şima de yê.''

Çalakîye bi sloganan qedîyaye.

Îstanbul de zî qezaya Bakirkoyî de cinîyan hêrişê cînsî yê vera domanan protesto kerdî. Hemsereka Komîsyonê Koçber û Multecîyan ê HDPyî Elîfe Bulut û xeylêk cinîyî tewrê çalakîye bîyî. Nameyê cinîyan ser o Nazliye Andan ard ziwan ke seba protestokerdişê hêrişê cînsîyî ê uca de yê û vat: ''Ma nêwazenê ke hînî cinî û domanî nêrê îstîsmarkerdene.''

Andane vera veradîyayîşê Serekê MHPyî yê Amedî Cîhan Kayaalpo ke tecawuzê domanan kerdo, nêrazîbîyayîşê xo mojna û vat: ''Şima sûcdar ê. Êyê ke nê sûcî kenê, ma vera hêrişanê cînsîyan ê cematan bêveng nêmanê.''

Eşkerayîye bi çepikan qedîyaye.