Tarîx de hêzê ke hêrişê merdiman kerdê çende bişidet têgêrayê, hemverê înan de zî bi heman şidetî cewab ameyo dayene. Sîstemî seva ke nêeşkayo xoverdayîşo ke bi xatirê azadîye yeno dayene hezm bikero tim pozîsyonê hêrişî de bîyo.

Seserra 21. de zî tarîx vizêr Kobanê û Efrîn de, ewro zî Xakurkê de hetê gerîlayanê azadîya Kurdistanî ra beno şahidê heman xoverdayîşî.

BERÎTANE HEMVERÊ CUYA KOLEDARE DE SERÊ TERAŞÎ DE PERAKERDIŞÊ VER BI AZADÎYE YA

Şarê kurdî ke mucadeleyê ganebîyayîş û xoverdayîşî dano nika bi hezaran qehremananê xo nameyê xo tarîxê azadîye rê nûseno.

Na cinîya ke vatibi “sifreyê Rojî de mi rê zî ca akerê, nê pêrodayîşî de ez zî esta” û bi hawayêkê bêemanî tewrê pêrodayîşê azadîye bîbî, ewro bi hezaran peyrewê aye estê. Berîtane hemverê kesanê ke vat “Xo înkar bike, ercanê xo ca verde û bêanor biciwîye” cewabêko pîl a.

ARTÊŞBÎYAYÎŞÊ CINÎYAN EMANETO TEWR GIRD O KE BERÎTANE RA CINÎYAN RÊ MENDO

Berîtane vîrêk a. Vîrê azadîya cinî ya. Besê ya, Zarîfe ya, Dêrsim a, Agirî ya… Berîtane şexsê xo de û çalakîya xo de artêşêk temsîl kerd û derbeyêko giran da her keso ke dişmenê azadî yo. Çunke çalakîya aye bîye sebeb ke artêşa cinî ya azade virazîyo.

Artêşbîyayîşê cinîyan ke bi YJA-Starî temamê  dinya de veng da, emanetê Berîtane yo tewr gird o ke cinîyan rê verdayo. Ewro Xakurkê de bi hezaran cinîyî vengê Berîtane ke teraşan de zimeno rê cewab danê.

PEYREWÊ BERÎTAN Û ZÎLANAN EWRO SEVA ŞARÊ XO CANÊ XO FEDA KENÊ

Dîktatorîya AKP/Erdoganî ya îşxalkare, kolonyalîste, qirkerdoxe û faşîste reyna wazenê ke xoverdayîşê şarê kurdî bişiknê, her hetan ra hêriş kenê. Labelê xoverdayîşê Xakurkê ke serra xo ya yewine pey de verdaye bîyo xoverdayîşê anor û azadîya merdimatî.

Cinîyê kurdan yê bi cesaretî hemverê sîleh û teyareyanê teknolojîkan ê neweyan de bi ramotişê îradeyê xo yê bi qehremanî bi aşman o ke bi hawayêkê bêemsalî xo ver danê.   

ÇÎYÊ KE XAKURKÊ DE YENÊ CIWÎYAYENE DO QEDERA AZADÎYA CINÎYAN BEWLÎ BIKERÊ

Wa no rind bêro zanayene ê kesê ke bi tehdîtanê xo vanê “Ma do dinyaya înan xira kerê” înan rê cewabo tewr pîl gerîlayê artêşa azade ya cinîyanê ke vanê “Ma do bi Berîtan bîyayîş serkewtiş bi dest fînê…” Xakurkê de danê.  

Xakurkê do xover bido, bêvindertiş mucadele bikero û bêguman bireso serkewtişî. Na yewe ra ganî cinîyî cepheyê azadîye de bibê Berîtan û Zîlane. Fedaîyan dir bibê yew perçe û azadî biqîrê.