Gerîlaya kurde Bêrîtane (Gulnaze Karataş) 25ê teşrîna verêne ya 1992yî de hêrişê dewleta tirke û PDKyî de şehîd bîye. Bi wesîleya serrgêra 30. ya şehadetê ci Endama Konseya Fermandarîye ya YJA-Starî Hêzile Ozgur ANFyî rê qisey kerd.

Qiseykerdişê Hêzile Ozgur ra beşêk wina yo:

''Serra 92yî de dewleta tirke hêzanê mîyanneteweyîyan û kurdan pîya Başûr, Xakurkê û Heftanînî de operasyon kerdêne. Şerêko giran qewimîyayêne.  Armancê nê operasyonî tasfîyeya gerîlayan bi. Embaze Bêrîtane o çax Rûbarok de fermandarîya tîma gerîlayan kerdêne. O çax Ferhat zî Xakurkê de wezîfedar bi û rîyê ey ra teslîmîyet vejîya vernî. O teslîmê hêzanê PDK, YNK û dewleta tirke bibi. La embaze Bêrîtane vera teslîmîyetî xoverdayîşêko xurt kerd. Embaze Bêrîtane rixmo ke birîndar bîye teslîm nênbîye, xo kendalî ra eşt wat û şehîd bîye. Bi na çalakîye xeta fedayîtî ya vera teslîmîyetî vejîyaye vernî. Heman çalakîye dima zaf embazanê ma kerde.

Embaze Bêrîtane embazêka roşnvîre û wende bîye. Aye qetî xo sînordar nêkerd, cuyêka normale qebul nêkerde. O çax tay embazanê feodalan vatêne ke embazê cinîyî tewrê şerî mebê, têna warê çapemenîye de bimanê. La embaze Bêrîtane bi tewirê xo mojna ke cinîyî eşkenê pêro erk û mesuldarîyan bikerê, serkêşîye bikerê. Embaze Bêrîtane Rayber Apoyî rê pêşnîyaz kerdbi ke romanê PKKyî û Serekîye wa bêro nuştene. Wexto ke Serek Apoyî no pêşnîyaz ercnayêne embaze Bêrîtane şehîd bîye. O çax Rayber Apoyî kesayetê embaze Bêrîtane analîz kerd û vat ke nê şehadetî di xetî vetî werte; xeta xoverdayîşî û û xeya îxanet-teslîmîyetî. Embaze Bêrîtane serkêşîya xeta xoverdayîşî, fedayîtî û çoknêdayîşî, Ferhatî zî serkêşîya xeta îxanet-teslîmîyetî kerde. Rayberîye 1993 de seba vîrameyîşê Bêrîtane artêşbîyayîşê cinîyan awan kerd û kanûna 93yî de mîyanê PKKyî de no bi hawayêkê fermî ame îlankerdene.

Artêşbîyayîşê cinîyan seba cinîyan bi gamêka pîle. O çax pêro gerîlayan ê cinîyan hînî taxim, mangayê xoserî awan kerdî û çalakîyê xoserî kerdî. O çax hişmendîya feodale ra zafêr cinîyan çeperanê peyan de şer kerdêne. Artêşbîyayîşê cinîyan no çi vurna û aqlê cinîyan şer de vejîya vernî. 1996 de zî şexsê embaze Zîlane û Sema de reyna tewirê fedayîtî vejîya vernî û no tewir sey mîrasê têkoşînê cinîyan kirişîyo nê rojan. Ewro kesayetê embaze Rûkene û Saran de çalakîya Mersîn de na xete dewam kerd. Ma vînenê ke ewro na xeta cinîyan ê kurdan pêro dinya de serkêşîya kena. Sloganê 'Jin, Jiyan, Azadî' zî Îran û Rojhelatê Kurdîstanî ra derbazê pêro dinya bi. 

Ganî pêro cinîyê Rojhelatê Mîyanênî û dinya dormeyê fikrê 'jin, jiyan, azadî' de bêrê pêser, xo rêxistin bikerê, yew bibê û vera ferasetê serdestîya camêrdan pîya têkoşîn bikerê. Embazê ma yê gerîlayî ewro çeperanê şerî de vera nê ferasetî vera dişmenê faşîst û îşxalkerî bi xurtî xo ver danê. Ma do nê têkoşînî bi serkewtişî tacîdar bikerê û bikerê dîyarîya Serekîye, şarê xo û embazanê xo yê şehîdan.''