Fermandaranê YJA-Starî Eyleme Ronî serrgêra qetilkerdişê Nagîhane Akarsel de qisey kerd û qala têkilîya Jineolojî ya bi Akarsele kerde.

Eyleme Ronî destpêk de Nagîhane Akarsel bi rêzî yad kerde ke hetê faşîzmê dewleta tirke ra bi barbarî ameya qetikerdene û vat: ''Ma do xoverdayîşê xo rê heta caardişê armancanê aye dewam bikerê. Nagîhane bi hawayêkê fîzîkîyî mîyanê ma de nîya la têkoşînê aye ciwîyeno. Ma bi hêzo ke xebatanê aye ra gênê, şer kenê. Embaze Nagîhale oxirê dewaya azadîye de bedelî dayî û şehîd bîye. Ma do bi serkewtişî cewab bidê nê bedelan.

Nagîhane 1976 de bajarekê Xelîkanî ya qezaya Cîhanbeylî ya Konya de dadîya xo ra bîya. Aye dibistan û lîse uca de qedînayî û Zanîngehê Gazî yê Anqara de beşê rojnamegerîye wend. Embaze Nagîhane kek, way, bira û dadîya xo reyde dewe de bîya pîl. Dadî û babîyê aye hema ke a domane bîya cîya bibî. Dadîya Nagîhane Elîfe cinîyêka otorîter û serwer bîye. Aye seba pawitişê domananê xo her fedakarîye kerdêne. Dewijan tira vatêne Elîfa gêje. Seba ke domanê ci biwanê aye zaf xîret kerd. Nagîhane zî dibistane de zaf serkewte bîye û dadîya xo ra dima keye de bîye otorîter.

Dima ke embaze Nagîhane zanîngeh de tewra karanê YCKyî bîye têkoşîn nêzdî ra şinasna. Aye metropolanê Tirkîya de asta serkêşîye de mîyanê ciwanan de kar kerd. Nagîhane keyeyanê wendekaran de ê perwerde kerdêne. Embaze Nagîhane keye bi keye gêrayêne, cinîyê ciwanî, cinîyê zewijnayeyî û kokimî rêxistin kerdêne. Aye kovara Ozgur Halkî keyeyan de wendêne. Çalakîya embaze Zîlane (Zeynepe Kinaci) 1996 de zaf tesîrê aye kerd. Seba ke na çalakîye bêra famkerdene aye kedêka pîle daye.

Embaze Nagîhane wextêk tepişîya û 7-8 serran zîndan de mende. Dima ke zîndanî ra vejîyaye zî karanê çapemenîye de xebitîyaye û rojnamegerîya cinîyan de bîye şagîrta Gurbetellîye Ersoz.

Embaze Nagîhane dima serê zemînê PAJKî de tewra perwerdeyî bîye. A bi eşqêkê pîlî mîyanê karanê Jineolojî bîye. Aye xîret kerdêne ke cinîyan bi zanistê jineolojî perwerde bikerê. Seba ke paradîgmaya azadîya cinîyan a Rayberîye bêra caardene aye perwerde da xeylêk cinîyan. Seba embaze Nagîhane her ca warê perwerdeyî bi. Koyan ra heta Rojawanî, uja ra heta Başûrî aye cinîyî roşnî kerdî. Jineolojî seba Nagîhane bîya hemleyêke û zemînê pênasekerdişê xo. Sey embazanê ci ma do tim layîqê vîrameyîşê aye bibê.''