Polîsanê tirkan vizêr eştbi merkezê Jinnewsî ser û mudir û edîtorê ci destbend kerdî. 

Muxabîra Jinnewsî Şîrîne Çinar û Şehrîbane Aslan derheqê sereştişê ajansê xo de ANFyî rê qisey kerd. 

Şehrîbane Aslan vat: ''Berê ajansî bi hetkarîya wezîfedarê bîna ame akerdene. Polîsî kewtî zere, înan dest na harddîskan, kartanê komputeranê ma ser û ê berdî. Rojnameyanê Xwebûn û Yeni Yaşamî ra ber înan kovarê Jineolojî zî berdî. Hetê bînî ra di komputerê ke ma seba montajjî şuxilnayêne înan berdî. Wexto ke ma serê sibayî ameyî nê dîmenî dîyî.''

Muxabîre Şîrîne Çinar zî ard ziwan ke tedayê vera ajansê înan û rojnamegeranê kurdan bi desan serrî yo dewam kenê û vat: ''Xora hêrişanê vera kurdan reyde medyaya kurdî ser o zî hêriş û tedayî yenê kerdene. Nê hêrişî newe nîyê. Derheqê sebebê destbendkerdişan de zî agahîyêke nêdîyaye.''

Çinare da zanayene ke ê derheqê heqanê cinîyan, sûcanê vera cinîyan de xeberan amade kenê û no zî îqtîdarî aciz keno. Çinare vat: ''Bi desan reyî keyepelê ajansê ma ame astengkerdene. Nê tedayî do dewam bikerê. Ma sey Jinnewsî û rojnamegeran do qetî apey gamêke nêerzê. Tedayî do pê ma nêeşkê. Heta ke ma est bê ma do nêverdê qelema cinîyan bikewa. Ma do serê rêçê înan de raştîye bimojnê.''