Raportora Tirkîya ya Parlamentoya Ewropa (AP) Katî Pîrî ke seba hedreyîyê raporê 2018î Tirîya de ya, keyeyê Demîrtaşî zîyaret kerde.

Pîrî ke bi heyetêk zîyaretê hetanê sîyasîyî girewtî rojdemê xo, hetê Başak Demîrtaşe û avukatê Demîrtaşî Mahsûn Karahanî ra ameye peşwazî kerdene.

Katî Pîrî hesabê xo yê medyaya sosyalî ra zîyaretî ra keyfweşîya xo arde ziwan û va: ‘‘Ma bi keye û avukatanê Demîrtaşî kombîyayîşêko rind viraşt. Seba ke Parlamentoya Ewropa û Mehkemeya Heqê Merdiman ya Ewropa qerarê azadkerdişê Demîrtaşî bidî, ma do têbigêrê.‘‘

Başak Demîrtaşe zî bi parekerdişê fotografêk zîyaretê Pîrî ra keyfweşîya xo arde ziwan û va: ‘‘Ez ûmid kena ke sîyasetmedar, rojnameger, akedemîsyen û wendakarî ke bîlaheq zindan de yê, helêk cuwa ver biresî azadîya xo.‘‘

Pîrî da zanayene ke seba zîyaretkerdişê Selahattîn Demîrtaşî aye muracet kerde, la cewab nêgirewte.

Yeno pawitene ke Pîrî Mêrdîn de Hemşaredarê Bajaro Pîlî yê Mêrdînî Ahmet Turkî zîyaret bikere.