Kaya: Fehm kerd ke kenê vîndî, reyna dest bi dek û dolaban kerd

Parlametera HDP’yî Hûda Kaya, seba ke Erdogan HDP’yî hedef musneno, reaksîyon da Erdoganî û va: “Vera 31’ê Adare, fehm kerd ke kenê vîndî, dest bi dek û dolaban kerd. No maskeyê zîhnîyeto ke bawerîyan îstîsmar keno do reyna bigino war o.“

Serekkomar Erdoganî seba cinîyanê Rayîrşîyayîşê Şewe yê Femînîstî vatbî “vera ezanî fîtike cinaya“ û cinîyî hedef musnaybî. Hûda Kayaye naye ser reaksîyon da Erdoganî û wina va: “Erdogan rêxistinanê qeza û bajaranê HDP’yî hedef musneno û hêzanê mîlîsan bi zanayene anceno bi teber û şarî yewbînan rê keno dişmen. Îqtîdar zano ke 31’ê Adare de keno vîndî û naye ra zî zuranê sey Kabataşî keno dewre.“

KESÊ KE VEJÎNÊ TEBER, HÊZÊ MÎLÎSÎ YÊ ÎQTÎDARÎ YÊ

Parlamentere Hûda Kayaye provakasyon ard vîrî û wina va: “Rêxistinê partîya ma binê tehdîdî de yê. Ez û parlamentere Remzîye Tosune, ma awanîya HDP’yî ya Bajarê Stenbolî de nobedarîye kenê. Îqtîdarî hêzê mîlîsî vetê teber û bi nê qeydeyî her kesî rê gefan waneno.“

MASKEYÊ ZUREKERAN DO REYNA BIGINO WAR O

Kaya va îqtîdar rastîyan xerepneno û wazeno ke bi nê qeydeyî şarî rê ferasetê xo yê şaşî bido qebulkerdene û wina dewam kerd: “Wexto ke polîsan mudaxaleyê rayîrşîyayîşî kerd, cinîyan fîtike cinite û eynî wext de zî ezan ame wendene. La Erdogan vano vera ezanî fîtike cinaya. No zur sey zurê Kabataşî yo. Kabataş de zî vatbî “hêrişê waya min a seregirewtîye kerdo“. La no zur nêame îspatkerdene. Ma ver a weçînayîşê 31’ê Adare şonê. Êdî baş zanê ke ê do bikerê vîndî û naye ra zî bi zuranê winasîyan, wazenê bawerîya şarî îstîsmar bikerê. Maskeyê înan do reyna bigino war o.“