Wendekara Zanîngehê Munzurî Gulîstane Doku ra 5ê çeleyê 2020î ra nata xebere nêna girewtene. Keyeyê Gulîstane seba ke aqîbetê kênaya ci bêro eşkerakerdene 1ê çeleyî de verê Edlîyeya Dêrsimî de çalakîya roniştişî dabi destpêkerdene. Çalakîye roja 27. de dewam kerde.

Keyeyê Gulîstane Doku ewro bi fotografanê kênaya xo ame verê edlîye û aqibetê kênaya xo persa. Endamanê Platformê Cinîyan ê Dêrsimî zî paştî daye keyeyê Doku. Dayîke Bedrîye Doku ard ziwan ke şikkerdeyo yewin Zainal Abarakov zano çi ameyo sereyê kênaya ci û  waşt wa Abarakov bêro muhakemekerdene.

Hettê bînî ra keyeyê Doku derheqê dayîka Zainal Abarakovî  Cemile Yucer de pêhesnayîşê sûcî kerd.Cemîle Yucer  CIMERî rê waştişname şawitbi ke qedexeyê tebervejîyayîşê înan bêro wedaritene.  Goreyê zanayîşanê ke ame girewtene nê waştişname de keyeyê Doku sey ''terorîst'' ameyo namekerdene. Nê semedî ra keyeyê Doku Serdozgerîya Komare ya Dêrsimî de derheqê Yucere de pêhesnayîşê sûcî kerd.