Cinîya Şengalije Olania Çendya ke dadîya 4 domanan bîye, şanê sêşemeyî şaristanê Dortmundî yê Almanya de hetê mêrdeyê xo ra bi kardî amebî kiştene. Daîreya ciwanan Jugendamtî domanî girewtî binê sîwana xo. Yeno vatene ke mêrdeyê ci verê cû zî Çendye rê şîdet kerdene û wextêk cayê pawitişê cinîyan de mende.

YJADî û FEDA vat: ''Hîkayeyê xemgînî yê şîdetê vera cinîyan bi tradîsyonê komelî û peygoşîya dewlete benê pîl. Şîdet têna zerar nêdano beden, heman wextî de hurmetê cinîye, waştişê cigêrayîşê edaletî yê cinîyan û xoverdayîşê vera binpaykerdişê heqan qels keno, yan zî çin keno. Şîdetê vera cinîyan dinya de bi taybetî meseleyanê ekonomîkan, sîyasîyan û etnîkan ra semed beno zêdêr. Mîsalo peyên ê naye zî qetilkerdişê dadîya 4 domanan o.Ma keyeyê Çendye rê serweşîye wazenê û nê şîdetê vera cinîyan şermezar kenê. Seba ke verê qirkerdişan bêro girewtene, ganî ma bî şîarê 'cinîya azade, cuya azade' rêxistinbîyayîşê xo xurtêr bikerê.''

SKByî zî eşkerayîya xo de kiştişê cinîyan şermezar kerd û vat: ''Şîdetê vera cinîyan her roje beno zêdêr. 15ê sibate de Hurîye Berlin de tedaya keyeyê xo ra xo kişt. Çendye reyde reyna cinîyêke ma ra kêm bîye.'' SKByî venga pêro cinîyan kerd ke vera tacîz û tecawuzî, şîdetî, kiştişê cinîyan têkoşînê azadîye pîl bikerê û xoverdayîşê xo xurtêr bikerê.