Endama Platformê 'Ma Verê Kişîyayîşê Cinîyan Bigêrê' Tuana Gençer derheqê babeta qanûnê înfazî yê neweyî de ANFyî rê qisey kerd.

Gençere ard ziwan ke bi qanûnê neweyî kiştoxê cinîyan û îstîsmarkerê domanan do vejîyê teber û vat: ''Kiştoxî û tecawuzkerî paştîya xo danê polîtîkaya bêcezaverdayîşî. A raşte no armmanc zî eşkera keno. Kiştox û tecawuzkerî do vera bidîyê la xebere nêra dayene cinî û domanan. Gereka xebere bêra dayene. Çunke babete ganê cinîyan o. Bi nê qanûnî heqê ciwîyayîşî destê cinîyan ra yeno girewtene. No qanûn keno ke cinîyî do bi rehetî bikişîyê. 

Wexto ke ma şinê qereqolî zor û zehmetîyan vînenê. Mehkeme û edlîyê zî wina yê. Îqtîdar bi polîtîkayanê xo, bi qiseyanê xo wayîrê cînayet û tecawuzanê vera cinîyan vejîyeno.''

Gençere da zanayene ke îqtîdar betalkerdişê Peymana Îstanbulî ra dima nika zî hêrişê qanûnê  6284î keno û vat: ''Ma seba heqanê xo yê tewr meşrûyan têkoşîn kenê. Ma qala ciwîyayîşî kenê. Nika îqtîdar hêrişê domananê kênayan keno û vano ke ganî kêna û lajî pîya nêwanê. Îqtîdar dima ke Peymana Îstanbulî betal kerde nika zî hêrişê 6284î keno û wazeno ke nê qanûnî zî wedarno.

Wa cinîyî nêtersê. Ma do bi têkoşînê xo yê rêxistinkerdeyî, bi rêxistin û têkoşînê xo têgêrenê. Coka metersê; cinîyî do qetî teyna nêbê. Cinîyî do domananê kênayan bidê wendene. Cinîyî do mîyanê komel, waranê cuye û karan de est bê. Ma do nêverdê ke qanûnê 6284î destî ra şoro.''