Aktîvîsta heqanê merdiman û endama Komelê Cinîyan ê Azadan ê Rojhelatê Kurdîstanî (KJAR) Werîşe Muradî ya ke Zîndanê Evînî yê Tahranî de yena tepiştene, 10ê Êlule Roja Vera Cezaya Îdamî ya Dinya de vera cezaya îdamî û rewşa tepişteyanê sîyayan dest pê grevê vêşanîye kerd û roje ra nata çalakîya xo rayra bena.

Rewşa Werîşê Muradî çend şino bena xirabe.KJARî da pêhesnayene ke tansîyonê Werîşe Muradî zaf ameyo war, rewşa ci bîya girane û beno ke bikewo koma.

KJARî seba ke çalakîya xo biqedîno veng da Werîşe Muradî û nê vatî: ''Ma hemraya ma ya xoverdayoxe û serkêşa xo rê selamanê xo şawenê û wazenê ke wa grevê xo biqedîno. Komîteyê ma do grevî rê dewam bikerê. Ma tîya ra danê eşnawitene ke, mado siba welatanê cîya cîyayan ê  Ewropa de semedê paştdayîşê Werîşe û heme kesê ke îdamî rê rî bi rî yê,  dest pê grevê vêşanîye yê hîrê rojan ê bidorî bikerê. Ma veng danê ke semedê Werîşe û cinîyan ê bînan ke zîndananê Îranî de yê wa paştdayîş bêro xurtkerdene.''