Koordînasyonê KJKyî bi eşkerayîyêke serrgêra 30. ya şehadetê ci de Bêrîtane (Gulnaze Karataş) yad kerde.

Eşkerayîye wina ya:

''Ma fermandara xo ya serkêşa dewrê cinîyan embaze Şehîde Bêrîtane serra 30. ya şehadetê ci de bi heskerdiş, bi rêz û minetî yad kenê û verê vîrameyîşê ci de sereyê xo anê war. Eke seserra 21. bîya seserra cinîyan ney de cayê xoverdayîş û qerardarîya embaze Bêrîtane yê vera faşîzmê dewleta tirke û xayînîya PDKyî est o. Qîrayîşê ci yo qerardaro ke vatêne 'ez do qetî teslîm nêba' hêrsê ci yê vera dişmenî peyê xo de mîrasêko pîl ê xoverdayîşî verda, bi rengê xoverdayîşê cinîyan ê seserra 21. Şehîde Bêrîtana ke cigêrayîşê azadîye de rûmetê xoverdayîşî yê cinîyan û şarî yo, bi çêrî û manaya pîle ya eşqê azadîye aferna, bîye fermana rayraşîyayîşê serkewtişî yê cinîyan.

Rayber Apoyî manayêka pîle daye çêrîya cinîyan û rûmetê xoverdayîşî ke şexsê embaze Bêrîtane de aferna û seba ke na çêrîye bivurîya destkewteyê mendeyî bira awankerdişê artêşbîyayîşê cinîyan daye. Artêşbîyayîşê cinîyan mîyanê prosesanê tewr girîngan ê tarîxîyan ra derbaz bi, mîyanê şeranê giranan ra derbaz bi û bi zêdekerdişê mana û çêrîyanê pîlan ê Şehîde Bêrîtane resa nê rojan. 30 serrî yo YJA-Star serê rayîrêkê winasênî de şino ke mîrasê pîlî tacîdar keno, bi sereberzî û hişmendîya serkewtişî şino serê dişmenî. Şehîde Bêrîtane kerd raştikên ke cinîyî key şer kenê benê azad, pê azadîye benê rind û nê krîterî ser o şehîd bîye. Aye bi nê hawayî rayîrê azadîye bi zelalî mojna û venga pêro cinîyan da ke bêrê nê rayîrê rindî ser.

Nika serewedaritişê cinîyanê Rojhelatê Kurdîstanî qetilkerdişê Jîna Emînî ra dima sloganê 'jin, jiyan, azadî' her ca de vila keno û raştîya artêşbîyayîşê cinîyan eşkera keno. Fermandara ma Şehîde Bêrîtana ke afernayoxanê na raştîye ra yew a, bi heskerdiş, serewedaritiş, embazî û qerardarî vera koletî û îxanetî çok nêşîye erdî ro û bîye fermandara tewr pîle ya tarîxê merdimîye. Ma Şehîde Bêrîtane ra musayê ke bi têkoşînêkê tîme, hişmendîya serkewtişî, serewedaritiş û hişmendî eşkenê xo biresnê azadîye û ver bi nê armancî şîyî.

Êyê ke ewro vera çekanê kîmyewîyan apey gamêke nêerzenê, sey embaze Sara û Rûkene bi qerardarî û fedayîtî şinê serê dişmenî hêzê ma yê gerîlayê cinî yê ke berhemê Şehîde Bêrîtane yê. Gerîlayê YJA-Starî rayraşîyayîşê xo yê tarî û heybetînî rê serra 30. de bi qerardarî dewam kenê, raştîya azadîye û cuye hele bi hele mojnenê. Bi embazî, bi eşqê azadîye, bi metodê fedayîtî û profesyonelî seserra 21. kenê seserra cinîyan û qet yew astengîye qebul nêkenê.

Şehîdanê ma yê cinîyan tarîxê cinîyan û tarîxê merdimîye newe ra nuşt. Şexsê embaze Bêrîtane de ma pêro şehîdanê xo bi rêzdarî yad kenê. Ma şerwan û fermandaranê YJA-Starî selam kenê ke tunelanê şerî, waranê Vakur û Başûrî de, çeperan de şer kenê. Bi wesîleya şehadetê embaze Bêrîtane serra 30. ya artêşbîyayîşê cinîyan ma pêro cinîyan rê fîraz kenê. Ma çalakîyanê YJA-Starî zî selam kenê ke bi hawayêkê netîcegîrî dişmenî lerznenê û serkewtişî mujde kenê.

Têkoşînê azadîye yê cinîyan ê Kurdîstanî bi têkoşînê rûmetênî yê gerîlayanê ma yê cinîyan û şehîdanê ma beno pîlêr. Nameyê KJKyî ser o ma vanê ke ma qerardar ê ke goreyê nê têkoşînê rûmetênî yê gerîlayanê YJA-Starî serê bingeyê cewabdayîşêkê xurtî de têkoşînî pîlêr bikerê.