Koordînasyonê KJKyî eşkerayîye nuştekîye daye û semedê xurtkerdişê têkoşînê radîkalî yê aktîfî veng da û nê vatî:

''Dayîkê Haştîye Adalete Safali û Perîşane Akçelîk û lajê ci Cîhan Akçelîk gama ke semedê îfadedayîşî kewtî rayîr, qeza kerd û dinyaya xo bedilnaye. Çend rojî verî zî Garîbe Aslana ke şîye zîyaretê lajê xo ke Zîdanê Xarpêtî de yo, qeza de dinyaya xo bedilnaye. Caardişê sey îşkenceyî yê tepiştiş, cipersayîş, qedexeyê vînayîşî, metodê  polîtîkayanê şerê taybetî yê. Nê mergî netîceya caardişanê faşîstan ê dewlete de qewimîyenî.

Ma nê welatperweranê xo ke dinyaya xo bedilnaye bihurmet yad kenê û sere de keyeyanê înan rê heme embazanê înan ê têkoşînî û şarê xo rê serweşîye wazenê. Ma nê hêzanê hêrişkaran şermezar kenê. Bi na wesîle ma hêrişê dewleta tirke ya faşîste yê vera kedkaranê çapemenîye yo ke vizêr Rojawan de ame kerdene, şermezar kenê. Ma şexsê welatperwerê ke dinyaya xo bedilnaye de heme şehîdanê xo yê azadîye bihurmet yad kenê û birîndaran rê şîfa wazenê.

Rejîmo faşîst ê AKP-MHPyî yo ke Rojawan, Şingal, Başûr û Vakur de bêmabên hêirşê şarê ma, cinîyan keno, vera waştişê haştîye û edaletî yê dayîkanê ma yo ke heqo tewr meşrû yo, bi hewayêkê wehşîyî hêriş keno. Dişmenê  ma ke esteyê domananê înan zereyê paketî de teslîmê dayîke û babîyanê înan kerdî ewro zî bi eynî waştişî hêrişê dayîkanê haştîye keno. Nê caardişê ke eybê merdimîye yê, nameyê ci zulum o. Nê caardişî vera heqanê merdiman rûmetê merdimîye yê. Nê hêrişê wehşî û bêehleq ê. Têna şermezarkerdiş nêvejeno.

Bi hêrişanê psîkolojîkan wazenê şarê ma, cinîyan dayîkan bitersnê û têkoşînî ra bifînê dûrî. Nê hêrişê ke ewro vera dayîkan, rojnameranê cinîyan, sîyasetmedar û şervanan yenê kerdene, semedê şiknayîşê moral û îradeyê ma yenê kerdene. Bi hezaran kesî zîndanan de yê, tepişteyê nêeweşî est ê, zîndanan de însanî yenê qetilkerdene, rixmo ke wextê cezayan beno de, tepişteyî nînê veradayene. Kenê ke bi nê zextan însanan teslîm bigêrê. La şarê ma rixmê heme zextan û dejanê giranan sey vizêrî ewro zî verê dişmenî de milê xo çewt nêkeno.

Dayîkê ma tesîlkarê têkoşînê azadîye û haştîye yê. Waştişê înan heqîqet o, haştîye û edalet o. Wa no rejîmo faşîst bizano ke bi nê hêrişanê vera têkoşînê haştîye yê bimbarekî yê dayîkan nêeşkeno cinîyan teslîm bîgêro. Faşîzm keno ke kam ke çok nêdano, hiş nêkeno, nîno bêvenkerdene, tira qesas geno.  Sebebê nê hêrişê wehşîyî hêrsê faşîzmî yo.  Bi nê hêrişan nêeşkenê îradeyê şarê ma bişiknê. Wazenê bi nê hêrişan mesaj bidê şarê ma. No şero psîkolojîk o. Nê hêrişê wehşîyî têna hêrsê ma zafêr kenê. Xoverdayîş do na herre de peynîya faşîzmî û serdestîya camêrdan bîyaro.

Dewleta tirke bêvengîya hêzan û dezgehanê mîyannetewîye ra paştî gena û nê hêrişan zêdînena. Ma veng danê heme hêzanê mîyanneteweyî ke wa vera nê hêrişan tewir bigêrê. Êyê ke ewro bêveng manenê do siba nê kerdişê xo ra bişarmîyê. Her hetî ra vera kurdan hêriş yeno kerdene. Şarê ma yeno qetilkerdene. Xozaya Kurdîstanî yena talankerdene. Çîyo ke DAÎŞî nîmcet verda, ewro dewleta tirke kena ke tewam bikero. Ewro bêvengîye nê îqtîdarî payra verdena. Êyê ke bêveng mamenê nê îqtîdarî weye kenê. No îqtîdar sûcê şerî keno. Do rojêke tira hesab bêro persayene.

Ma têkoşînê heqdarî yê dayîkanê xo silam kenê. Têkoşînê înan têkoşînê ma yo. Ma veng danê heme hêzanê cinîyan û şarî ke wa her warî de vera faşîzmî têkoşînê radîkalî yê aktîfî  xurt bikerê. Ma do ameyoxê azadî teqdîmê dayîkanê xo bikerê ke dejê înan biney kêm bo. No deynê milê mayo.''