Komîteya Têkilî û Îtîfaqanê Demokratîkan a KJKyî bi eşkerayîyêke şermezar kerd ke Azîme Arsun Meydanê Teyarayan ê Hewlêrî de tepişîyaya û waşt ke cade a bêra veradayene.

Eşkerayîye wina ya:

''2yê gulane de embaza ma Azîme Arsun wexto ke seba tedawî şîyêne Ewropa Meydanê Teyarayan ê Hewlêrî de waştişê dewleta tirke ser o tepişîyaye. Ma ney şermezar kenê. Parastinî embaza ma berde cayêkê nedîyarî û bi rojan o derheqê embaza ma de xeberêke nêna girewtene. Beno ke embaza ma ya ke bi hemkarîya MÎTî ameya remnayene, teslîmê dewleta tirke do bêra kerdene.

Seke zanîyeno Komara Tirkîya serranê peyênan de polîtîkayê qirkerdişê cinîyan û qirkerdişê kurdan Başûrê Kurdîstanî de kerdê xorin. Milîtan û welatperwerê ma yê ercîyayeyî Başûr de sûîkast û hêrişan de yenê qetilkerdene û Herêmanê Pawitişî yê Medya de vera gerîlayan çekê kîmyewî şuxilîyenê. Nê kerdişî zerar danê yewîye, yewbîyayîş û menfaetanê neteweyîyan ê kurdan. Bêtewirîye û bêvengîye zî hêz danê dewleta tirke. PDK zî na babete de cesaret dano dewleta tirke ya faşîste.

Bi nê hawayî têkilîyê tay hêzanê Başûrî bi dewleta tirke hem benê trajîk hem zî benê tehlukeyîn. Ganî bizanîyo ke tepişîyayîşê embaze Azîme teyna zerrîya dişmenanê kurdan keno weş.

Nê prosesê tarîxî yê weçînayîşanê Tirkîya-Vakurê Kurdîstanî de serebûto winayên ancax sey hemkarîya bi AKP-MHPyî yeno pênasekerdene. Ganî nêro vîrakerdene ke ê hêzê ke rejîmê AKP-MHPyî rê hemkarîye kenê, seba ke rejîm bin nêkewo her çî keno. Coka ma venga hêzanê mesuldaranê nê serebûtî danê ke hesabanê şaşan mekerê û cepheyê xoverdayîşî yê vera faşîzmî rê wayîr vejîyê. Sey cinîyan ganî ma xîret û xebatanê xo bizêdînê. Bi na wesîle ma venga pêro cinîyanê Başûrî yê welatperwer, demokrat û roşnvîran danê ke vera nê serebûtî bibê wayîrê tewirî.''