Koordînasyonê KJKyî eşkerayîya xo ya nuştekîye de ard ziwan ke hêrişê vera Rojawanî tesîrê pêro Kurdîstanî kenê û vat,  “Her hetî rê hêrişî est ê, rayîrê vergirewtişê hêrişan xoverdayîş o.”

Eşkerayîya KJKyî wina ya:

“Dewleta tirke polîtîkaya xo yê dişmenîye ya vera cinîyan, kurdan û merdimîye verê çimanê pêro dinya de Vakur û Başûrê Kurdîstanî de rayra bena. 20ê hezîrana 2023yî de Hemsereka Meclîsê Bajarî yê Qamişloyî Yusra Derwêş, hetkara ci Leymane Şiwêş û Ferat Tuma bi hêrişê droneyê çekdarî qetil kerdî. Eynî hêrişî de hemsereko suryanî Gabî Şemun zî bi giranî birîndar bi. Ma merdiman û hemrayanê şehîdan û şarê xo yê welatperwerî rê serweşîye û birîndaran rê şîfa wazen.Ma do xo bipawê û heqê xo yê qesasgirwtişî bişuxulnê.

Şar û cinîyê ma yê erjîyayeyî!

Dewleta tirke seserrî yo bêmabên vera kurdan hêrişê qirkerdişî kena. Rayber û serkêşanê kurdan ke xover danê û têkoşîn kenê, hedef gena. Wazena ke kurdan bêrêxistine, bêserkêş û bêstatu biverdo, asîmîle û surgun bikero û daliqnayîş û qetilkerdişî estbîyayîşê kurdan werte ra wedaro. Gama ke nê kena kurdanê xayînan, dewletanê herêmê ke dişmenê kurdan ê û hêzanê hegemonan ê mîyannteweyî ra paştî gena. Serrgêra Pêkerdişê Lozanî de hêrişê vera kurdan zêdîyayî. Dewleta tirke hêrişê xo kiriştî teberê sînorî. Başûr, Rojawan û Rojhelatê Kurdîstanî de hêriş kena. Teberê welatî de zî hêrişê kurdan kena. Qet huqûqê mîyanneteweyî û çîyo ehleqî û merdîmî nas nêkena. Dinya têna seyr kena. Seba ke kurdan û Rojawanî DAÎŞ bin vist, Tirkîya qesas gena. Sere de koalîsyonê mîyanneteweyî yê vera DAÎŞî, komelê mîyanneteweyî vera nê hêrişan bêveng o. Na bêvengîye zaf bêdej a, cayê ci merdimîye de çîn o.

Îqîtdar keno ke pê konsepte hêrişî û polîtîkaya dişmenîye ya vera merdimîye kurdanê xoverdaxan çîn bikero. Gerek vera nê hêrişan xoverdayîşo dahîna xurt bêro kerdene. Rolê Rojawanê Kurdîstanî her hetî ra gird o, hêzê mîyanneteweyî bi bêvengîya xo benê hemkarê nê hêrişan. Cinî û kurdanê ke DAÎŞ vindarna yenê qetilkerdene. La seba ke Tirkîya endama NATOyî ya çewî ra veng nêvejîyeno. Nê hêrişî mojnenê ke Rojawan senî binê tehlukeyî de yo. Waşitşê dewletanê serdestan, bazarîyanê leyminanê ke yenê aktuelkerdene û pêkerdişanê dîplomatîkan oyo ke kurdan bêîrade biverdê  ke wa meeşkê xo îdare bikerê û ameyoxê xo îdare bikerê. Hêrişî vera pêro Kurdîstanî yê. Kenê ke yew bi yew destkewteyanê kurdan çîn bikerê. Her hetî rê hêriş kenê, rayîrê vergirewtişê hêrişan xoverdayîş o. 

Payramendişê Rojawanî  tesîrê heme Kurdîstanî keno. Çînkerdişê destkewteyan zî do tesîrê heme Kurdîstanî bikero. Destkewteyî bi xoverdayîşê girdî ameyî destfînayene. Ma veng danê cinîyan û kurdan ke wa têkoşînî xurtêr bikerê. Xoverdayîşo pasîf nêbeno, gerek xoverdayîşo radîkal bêro kerdene. Qederê şarê ma yê Rojawanî binê rîskî de yo. Bedelê ci çi beno wa bibo, gerek  destûr nêro dayene ke destkewteyî bêrê derbkerdene. Ma reyna şexsê Yusra Dewrêş, Leymane Şwêş û Ferat Tuma de şehîdanê azadîye û demokrasîyî yad kenê û hêrişî şermezar kenê. Na çarçewe de ma veng danê ke sere de şarê Kurdîstanî wa her kes vera nê hêrişanê faşîstan tewirê xo ramojno û têkoşînî xurtêr bikero.”