Koordînasyonê KJKyî derheqê hêrişanê kîmyewîyan ê artêşa tirke de eşkerayîye daye û nê pare kerdî:

''18ê teşrîna verêne de Fermandarîya Merkezê Pawitişê Şarî da zanayene ke şerê di aşmanê peyênan de 17 gerîlayî hêrişê çekanê kîmyewîyan ê artêşa faşîste ya AKP-MHPyî de şehîd bîyî. 14ê nîsane ra nata  nê hêrişan de pêro pîya 44 embazanê pê çekanê kîmyewîyan şehîd bîyî. Şehîdê ma yê ke rixmê heme teknîkê dişmenî mewzîyanê têkoşînî bi hewayêkê qehremankîyî şer kerd, ma înan bihurmet yad kenê. Ma soz danê ke ma do têkoşînê embazanê xo biresnê serekwtişî.

Dişmen rixmê heme tecrubeyê xo yê şerî û heme teknîkê xo seba ke vera gerîlayanê ma ser nêkewno pê çekanê kîmyewîyan hêriş keno. No mojneno ke dişmen senî bêhêz  û bêçare yo.  Nê prosesê şerî yê şeş aşman de gerîlayî erazî û tunelanê şerî de qet gamêka qişkeke peyser nêeşte û her tim şinê dişmenî ser. Hukmatê şerî yê AKP-MHPyî bêçare yo.  Wextê ci yo.  Sere de Kurdîstan her cade wextê azadîye û demokrasî yo, wextê serkewtişê şaran û cinîyan o. Ewro Rojhelat de cinî û şarî merg, îdam, îşkence û her çî genê çim û wirzenê  serhildanan. No semedê her çîyî çimeyê îlhamî yo.  

Ganî heme cinî û şarê ma inkey derba mergî bidê hukmatê faşîstî ro û têkoşînî pîlêr bikerê. Semedê kurdan û cinîyan  bê rêzilê qirkerdişî yê înkar û îmhayî yewna çîyo ke vîn bikerê, çîn o. Na çarçewe de ganî ma wirzê payan ser, şirê dişmenî ser û ey tecrîd bikerê û tarîxî ra biesterê.  Seserra 21. de ma bendê qirkerdiş û îdamî yo ke milê kurdan de ameyo daliqnayene biqerfnê bierzê, Kurdîstanê azadî û şorişê cinîyan şaranê herême û dinya rê bikerê dîyarî.

Semedê cinîyan û kurdan têna rayîrê cuya azade est o. Pê metodanê cîya cîyayan ê şerê taybetî û her qeyde teknîkê şerî, çekanê kîmyewîyan kurdan û cinîyan hedef genê. Wazanê ke kurdî û cinîyî tim sey koleyan biciwîyê. Vera nê ganî ma ercanê xo bidê ciwîyayene û azadîye xo bipawê. No wezîfeyê ma yo neteweyî û merdimî yo. Sere de cinî û ciwanî her kes ganî semedê azadîye pawitişê xo bikero. Ganî her ca de paştî bidîyo têkoşînê gerîlayan.

Dişmenê koyan de pê çekanê kîmîyewîyan gerîlayan bênefes verdeno û bajar û dewan de zî xoza, komel û cinîyan bênefes verdeno ke qetil keno. Pê jehrê şerê taybetî cehd keno hem fîzîkî hem manevî jehr bikero, bimerno, hetê madî û manevî ra bikerê kole ke nasnameyê kurdan û cinîtîya azade çîn bikero. Cinî û kurdî ganî vera nê şerê leymin û taybetî şerê xopawitişî yê birumetî xurtêr bikerê û her cayî biaçarnê warê têkoşînî.

Kurdî û cinîyî ganî vera xayînîya PDKyî tewir bigêrê. PDKyî herinda têkoşînê vera dişmenî de çim verda maskeyanê gazî yê gerîlayan. Seba ke PDKyî dest na maskeyanê gazî ser û rayîrê dişmenî yê vera koyanê azadan akerd, engişta ci zî şehadetê embazanê ma de est a. Şar û cinîyê ma ganî cewabê nê îxanetî bidê. Tewr zaf zî ganî şarê Başûrî ke Helebçe ra dejê kîmyewîyî zano vera nê vejîyo û hesab biperso. Na çarçewe de ma veng danê her kesî ke wa pê têkoşînî şiro dişmenî ser. Ganî hêzê azadîye û demokrasîyî bibê yew derba mergî bidê dişmenî ro.''