KJK: Xoverdayîşê cinî azadîye rê rayîr akeno

KJK: Ruhê prosesî ma ra xurtkerdişê mucadeleyê azadîye wazeno. Seba ma lazimîyêka tarîxî ya ke ma na seserre bikerê seserra cinî, xora îmkanê nê zî estê. Bêrê ma seba nê bibê yew. Ma cinîyê temamê dinya hurzê payan ser.

Koordînasyonê Komalên Cinîyan ê Kurdistanî (KJK) bi wesîleya 8’ê Adare Roja Cinîyan ê Kedkaran ê Dinya deklarasyonêk weşana.

Eşkerayî wina ya:

 “Ma koyanê Kurdistanî ra ke serê înan de hezaran serran verî bi serkêşîya cinîyan reya ewilêne cimatbîyayîş virazîya û toximê kulturê cuya hempare ameyî karitene, ma şima bi sînayîş virare kenê û bi eşqê xo yê cuya azade û mucadeleyê xo yê bêhempayî şima silam kenê. Her cayê dinya de heme cinîyê ke hemverê serdestîya camêrdî, îşxalkarî, rijnayîşî, kolekerdişî de vengê xo kenê berz û xover danê, ma silamanê xo yê zerrî û canî ra înan rê şirawenê.

Hemverê heme cehdanê bêvîrverdiş û bêtarîxverdişî yê sîstemê serdestî de ma cinîyî zanê ke ma wayîrê tarîxê xoverdayîşê merdimîye yê tewr dergî, tewr kanî û tewr bingeyênî yê. Ma mucadelekaranê serkêşan ê Têgêrayîşê Azadîya Cinîyan, Sakîne Cansize, Zekîye Alkane, Gulnaz Karataşe, Zeynep Kinaci, Sema Yuce, Vîyan Sorane, Şîrîn Elemhulî, Şîlan Kobanê, Arîn Mîrkane û heme şehîdanê bi hesret û bi heskerdiş bi vîr anê. Ancî Rosa Luxemburge ra heta Clara Zetkîn, Haydee Santamaria ra heta Kittur Ranî, Şadîye Ebu Ghazalehe ra heta Nwanyeruwa, Mary Jonese ra heta Dorîa Şefîke, Marî Beyleryane ra heta Louise Michele; ma heme cinîyanê ke more xo dayo mucadeleyê ûnîversalî yê azadîya cinîyan ro, bi rindekî înan anê vîrî. Vîrardişê înan zereyê ma rê adir, mezgê ma rê roşnayî û meşaleyêk o ke tarîyîya ke ma ser o yena ferzkerdene perçe keno û rayîrê ma keno roşin.    

 ‘MA ÇAXÊKÊ WINAYÊNÎ DE YÊ KE POTANSÎYEL Û DÎNAMÎKÊ ŞORIŞÊ CINÎ HER WEXTÎ RA VÊŞÊR Ê’

Tu seserre qasê seserra 21’ine seba bicaardişê azadîya cinîyan îmkan nêdayo. Naye ra ma çaxêkê winayênî de yê ke potansîyel û dînamîkê azadîye cinîyan tewr vêşî yê. Sîstemo serdest seba ke na rastî binimno, bi heme tewir kay û hêrişan cehd keno. Ganî cinîyî bi zanayîşê nê heqîqetî, bi zanayîşê çaxî nizdbîyayîşê xo vejê vernî û mucadeleyî virare bikerê.   

Sîstemo îqtîdar û pederşah o 5 hezar serre ke hemverê cimatî de yo, bi pîlkerdiş û vilakerdişê îşxalkarîye estbîyayîşê xo domneno. Heme cayanê dinya de no sîstem bi hêriş û qirkerdişan wazeno ke xo pay ra verdo. Ma bênefes yenê verdayene. Tradîsyonê ma yê bi hezaran serran, nasnameyê ma yê kulturkîyî, sîstemê ma yê cimatkîyî yenê çinêkerdene. Heme wareyanê cuye de, dereceya qirkerdişî de ma hêrişanê îmhakerdişî dir têrî yê. Wazenê ke ma bêvîr verdê. Çunke ê rind zanê ke êyê ke vîrê înan çinyo ameyoxê înan zî çinyo. Bi nê hawayî wazenê ma teslîm bigîrê. Roja ma ya ewroyêne de şîdetê camêrdî, heme şer û nêweşîyan ra vêşêr cuya cinîyan ser o tehluke yo.

Ewro qaso ke tu demê tarîxî de nêbîyo, hende cinîyî bi vengêkê berzî sîstemê îşxalkar ê pederşahî ra vanê NÊ! Cinîyî heme tewiranê îşxalkarî, qirkerdiş, talan û kolonyalîzmî rê vengê xo kena berz û vana HENDÎ BES O!  Cinî hemverê ê heme çîyan de vejêna. Cinîyî paştî danê yewbînan û benê hempar. Mucadele kenê û xo organîze kenê. Bi mîlyonan cinîyî payan ser o yê, nêtersenê, game peyde nêerzenê. Se beno wa bibo, vanê; ma do azadîya xo bi dest bifînê. Ma sey Têgêrayîşê Azadîya Cinîyanê Kurdistanî, bi coşêkê şorişgêrî û zerrî û canî ra xoverdayîşê cinîyan ê ke hemverê sîstemê pederşahî de û kolonyalîzmî de kenê silam kenê.

KIŞÎYAYÎŞÊ CINÎYAN QEWIMÎYAYÎŞÊ ŞEXSKÎYÎ NÊYÊ

Ma mucadeleyo kîtlekî ke hemverê qirkerdişê cinîyan de Amerîkaya Latîne de bi slogana Nî Ûna Menos, yanî ma do yewna cinî vîndî nêkerê, dewam keno silam kenê. Kişîyayîşê cinîyan qewimîyayîşê şexskîyî nêyê û bingeyê xo dişmenîya cinîyan û zayendperestîya cimatkîye ra gênê. Naye ra ma nê ra bawer ê ke seba ke vernîya qirkerdişê cinîyan bêro girewtene, hemverê zihnîyetê zayendperestî de mucadeleyêko bitesîr lazim o. Ma silamanê xo yê zerrîgerman seba wayanê xo yê bi fularanê keskan ê Arjantînijan rê zî şirawenê.

Hemrayê ma yê Zapatîstî ke daristananê Chîapasî de hem hemverê dewleta Meksîka û hêrişanê kapîtalîzmî de xover danê û hem zî sîstemê xo yê xoser ê komînarî awan kenê, rîyê hêrişanê giranan ra nêeşkenê emser Pêvînayîşê Cinîyan ê Xoverdayoxan yê dîyinî virazê. Ma înan ra vanê ke; hemrayêne, bizanê ke adiro ke şima fînayo ta, Kurdistan de zî takewto. Zagrosan ra heta Sierra Madre, Firat ra heta çemê Usumacinta, mucadeleyê ma yew o, xoverdayîşê ma yew o û şarê ma wayê û bira yê. Ma şima bi heskerdiş, hemrayî û bi wayî silam kenê û bi zerra germine şiöa virare kenê.

Demavend ra heta Hindukuş, Gazze ra heta meydanê Tahrîrî, ma leşkeranê bêters ê xoverdayîşê berzî yê cinîyan bi hurmet silam kenê. Ma heme cinîyan ê Êzidî, Suryanî û Ereban ê ke serkêşîya xoverdayîşê hemverê DAÎŞ'î kerde û ramotî heme cinîyan ke pawitişo cewherî îhtîyacîyêka çiqas muhîm a, înan hemine rê silam û hurmetanê xo yê şorişgêran şirawenê. Rojakewtena Mîyanêne de, şorişî cinî yo dîyin heqîqetêk o û ma heme perçeyêkê nê heqîqetê pîrozî yê. Nê heme pîya, tarîyîya ke ma ser o yena ferzkerdene bin bifînê û erdê xo reyna bikerê welatê maye îlahe. Vengê şorişê cinî nika ra beno berz, Rojawanê Kurdistanî ra Rojakewtena Mîyanêne rê vila beno.

 ‘BI DES HEZARAN CINÎYÊ ESÎRÎ XOVERDAYÎŞÎ PÎL KENÊ’

Ma xoverdayîşê bi desan û beno ke bi se hezaran tepişteyanê sîyasîyan ê cinîyan, ke seba mucadeleyê azadîye dayê esîr ameyê girewtene silam kenê. Bizanê ke dêsê mabênê ma çiqas berz benê wa bibê, ê nêeşkenê ma yewbînan ra aqitnê. Ma veng danê heme cinîyan ê dinya ke çalakîya tepişteyan rê wayîr vejîyê.

Bendewarîya cinîyan ê ke yewbînan rê paştî danê na ya ke sere de Almanya de, heme cayanê ke grevê cinîyan esto, grûbê herêmkîyî yê ke yewbînan ra aqitnaye yê û perçe perçe yê, bi wesîleya 8’ê Adare bibê yew û tîfaqêkê mendeyî virazê. Amerîka de cinîyanê ke vat wextê ci ameyo ke ganî zayendperestîya cimatkî hendî bêro teşhîrkerdene, bi kampanyaya #MeToo kulturê pêşkarbîyayîşî û destdergkerdişî teşhîr kerd, heta Washington rayra şîyî û ard ziwan ke ê Trumpî sey temsîlkarê xo nêvînenê. Ma înan zî silam kenê.

‘HEMLEYA XOVERDAYÎŞÎ YA SEBA RAYBER APOYÎ BI SERKÊŞÎYA CINÎYAN RAYRA ŞINA’

Hemleya xoverdayîşî ya bi slogan ‘Ma do tecrîdî bişiknê, faşîzmî birijnê û Rayber Apoyî dir azad biciwîyê’ bi serkêşîya cinîyan rayra şina. Hemraya ma, hemsereka Kongreya Cimatê Demokratîkî û parlamentera HDP’yî Leyla Guvene, 7’ê Teşrîna peyêne 2018’î ra nata grevê vêşanîye yê bêdem û bêagêrayîşî de ya. Girawa Îmraliyî de kerdişê huqûqî yê seba yew kesî yenê bicaardene. Dewleta Tirkî qanûnanê xo zî binpay kena û sîstemêkê taybetî ke seba her kesî bica nêana ûca rayra bena. Sere de CPT ke girêdayeyê Konseya Ewropa yo û dewleta Tikî zî endama ci ya, bêveng manenê û bi nê hawayî sîstemê esîrî û îşkenceyî tesdîq kenê.

Rayber Abdullah Ocalan tepişteyêko alelade nêyo. O rayberê şarêk o ke nameyê ci zî ameyo qedexekerdene. Pawitişê xo yê ke ê mîyanê şertanê tecrîdkerde û giranan de nûştê ewro her çar hetanê dinya de hetê xeylî têgêrayîşanê antî-sîstemî, şaranê herêman, organîzasyonanê cinîyan, partîyanê çepgêran û sosyalîstan ra bi heyecanêk yenê wekinitene. Şexsê Rayberê ma Abdullah Ocalanî de, êyê ke yenê tecrîdkerdene, çareserîya demokratîke ya problem Kurdan a, umîdê aşitî yo, cuya hempare ya şaran a û azadîya cinîyan a. Seba ke Rayber Apo tecrîd de yo Tirkîya de faşîzm vila beno, şer xorî beno û neteweperestîye newe ra gane bena. Eke ma xoverdayîşî xurt bikerê, do tecrîd raste ra wedarîyo, faşîzm bin bikewo, Kurdistan azad bibo. Bendewarîya ma şima ran a ya ke şima zî seba nê xoverdayîşî paştîdayîşê xo ramojnê, veng bidê vengê ma û ma reyde hemverê faşîzmê Tirkî de xover bide!

 ‘CINÎYÎ WAYÎRÊ Ê HÊZÎ YÊ KE HER CA DE RAZÎNÊBÎYAYÎŞÊ XO RAMOJNÊ’

Her ca de, ma benê şahidê vêşîbîyayîşê zanayîşê cinî û çalakîyanê cinîyan. Cinîyî hemverê kulturê pêşkarbîyayîş û desteştişî, cîyakarî, kolonyalîzmî, îşxalkarî, nêseypêyîye, qirkerdiş, şidet û zayendperestîye vindenê, protesto kennê û xover danê. Potansîyelê çalakîye yê cinîyan resayo dereceyêkê xeylî muhîmî. Hûmara ma roje bi roje bena vêşî. Roje bi roje ma hîna zaf benê bihêz. Ma bireng ê, aktîf ê, biqerar ê, wayîrê amacî yê û bihêz ê!

‘SEBA KE SESERRE BIKERÊ ÇAXÊ AZADÎYA CINÎ’

Ruhê çaxê ma fermanê berzkerdişê mucadeleyê azadîye dano. Ma eşkenê çaxê xo açarnê bi çaxê azadîya cinî, no heman wextî de seba ma îhtîyacîyêka tarîxî ya. Bêrê ma pîya seba nê amacî bibê yew. Sey cinîyê dinya hurzê payan ser. Ma vanê ke xoverdayîşê cinî rayîrê azadîye akeno. Naye ra ganî ma hemverê îşxalkarîye, faşîzmî, kolonyalîzmî û pederşahîye her roje bikerê 8’ê Adare û xoverdayîşê xo bikerê mende. A game do cuye bivurîyo. A game, do dinya bibo weşe, do şoriş virazîyo. Ma heme pîya şorişê cinî xurt bikerê û ameyoxê xo awan bikerê!