Koordînasyonê KJKyî bi eşkerayîye da zanayene ke bi wesîleya serrgêra 3ê Tebexe Qirkerdişê Şingalî û 15ê tebaxe ke Talîbanî îqtîdarê Afganîstanî fîna dest do mabênê 3-15ê tebaxe de kampanya bidê domnayene. Kampanya do bi sloganê ''Vera hêrişanê camêrdan ê hegemonî ma cayê cinîyan ê Şingal û Afganîstan de yê'' bêro kerdene.

Eşkerayîya KJKyî ra qismêk wina yo:  “Qirkerdişê Şingalî 3ê Tebaxa 2014î yo ke hetê DAÎŞî ra verê çimanê dinya de ame kerdene û hêzanê leşkerî yê PDKyî zî caverda û remayî, 9 serrî xo dima verdayî. Ma sere de şarê xo ke ame qetilkerdene, yad kenê û nê hêrişê hêzanê ke dişmenê cuye û cinîyan ê, şermezar kenê. Ma têkoşînê êzîdîyan o ke semedê pawitişê estbîyayîş û nasnameyê xo rayra benê, silam kenê. Sey wextê qirkedişî ewro ra tepîya zî ma do tim her şertan de cayê şar û cinîyan ê êzidîyan de bê.

Seserra 21. de verê çimanê dinya de şarê êzidî  ame qetilkerdene. Iraq û peşmergeyê ke Şingal de berpirsîyar bî şar têna verda, remayî. Bi hezaran kesî ameyî qetilkerdene, bi hezaran cinî û domanî ameyî remnayene û bazaranê koleyan de ameyî rotene, raştê hêrişanê psîkolojîk, kulturkî, fîzîkî û cinsî ameyî. Bi sehezaran kesî seba ke ganê xo bixelisnê her çî caveRda barkerd. Rîyê hêrişanê qirkeridşî ra 500.000  kesan Şingalî ra bar kerd. Ewro hema 250.000 êzidî teberê cayê roniştişî de, herêmanê cîyayan ê Iraqî de yê. Reyna Tirkîya, Surîye û Ewropa de yê.

DAÎŞî qirkerdişê xo bi hewayêkê sîstematîkî vera cinîyan kerd. Bi seyan cinî û domanî remnayî, cinîyî sey koleyanê seksî bazaran de rotî û domanî sey şervananê xo perwerde kerdî û şuxulnayî. 87 Mezelanê komkîyan ê kesanê ke DAÎŞî qetil kerdî ra têna 36 hepî ameyî akerdene. Hema aqibetê 2700 cinî û domanan nîno zanayene. Tehlukeyê vera Şingalî dewam keno.  Dewleta tirke her roje hêrişê Şingalî kena û şarê ma qetil kena. PDK rojane bi propagandaya reşe hedef mojneno û tehdît keno.

Afaganîstan de zî cinîyî wina raştê hêrişî yenê. Îqtîdarê Talîbanî yo ke dişmenê cinîyan o caardişanê teberê merdimîye bi destûrê hêzanê mîyanneteweyî keno. Qewimîyayîşê sey Şingalî Afganîstan de zî bi. Badê pêkerdişê mabênê Amerîka û Talîbanî heme dinya qetilkerdişê îqtîdarê Talîbanî seyr kerd.

Gerek dewletê ke rolê înan qirkerdişanê Afganîstan û Şingalî de est o û înanê ke çimê xo qirkerdişan rê girewtî, hesab bidê cinîyan û merdimîye. Seba ke dewleta tirke ya paştgêra DAÎŞî û dewletê ke sey ci yê nêameyî muhakemekerdene no eyb o û verê qirkerdişanê bînan akeno. Neteweyê Yewbîyayeyan, Parlamentoyê Ewropa û xeylê parlamentoyanê netewîyan wehşetê Şingalî sey jenosîdî qebul kerd. Ma veng danê nê welat û dezgehan ke seba ke wa berpirsîyarî bêrê muhakemekerdene wa têbigêrê. Êzidîyê ke wazenê agêrê herra xo raştê astengîyan yenê. PDK gerek agêrayîşê êzidîyan rê mebo asteng.

Ma sey Koordînasyonê KJKyî bi wesîleya serrgêra 3ê Tebexe Qirkerdişê Şingalî û 15ê tebaxe ke Talîbanî îqtîdarê Afganîstanî fîna dest mabênê 3-15ê tebaxe de bi sloganê 'Vera hêrişanê camêrdanê hegemonî ma cayê cinîyan ê Şingal û Afganîstan de yê' kampanya danê destpêkerdene. Ma pê kampanya wazenê qirkerdişê vera cinîyan bifînê çiman ver. Ma pê na hamle wazenê şexsê cinîyan Şingal û Afganîstan de bibê vengê heme cinîyan û sûcê ke ameyî kerdene dinya rê bidê eşnawitene. Ma veng danê heme cinîyan ke wa paştî bidê têkoşînê cinîyan ê Şingal û Afganîstanî û tewrê hemle bibê. Ma pêro pîya hesabê qirkerdişê cinîyan bipersê."