Komeleya Cinîyan a Rosa derheqê operasyonê qirkerdişê sîyasîyî yê de bexçeyê komele de eşekrayîya çapemenîye daye. Îdarekar û endamê Komeleya Cinîyan a Rosa û temsîlkarê rêxisitinanê cinîyan tewrê ci bîyî

Hemsereka Komeleya Cinîyan a Rosa Adalete Kaya ard ziwan ke vera komeleya înan û keyeyanê xelyêk cinîyan sereştiş ameyo kerdene û vat: ''Ma ewro zî pê sereştişê polîsan aye bîyî. Par 22 gulene ra nata hêrişê vera komleya ma û mucadleyê cinîyan ê Amedî hêrişî estê. Amed de Hema hema derheqê her cinîya ke mucadeleyê azadîye yê cinîyan de ca gena de cipêrsayîş dîyayo destpêkerdene. Ma sey Komeleya Cinîyan a Rosa vera qirkerdişê cinîyan mucadele kenê. Ma vera tacîz, tecawuz , zewajê domanan, vera betalkerdişê Pêkerdişê Îstanbulî, vera xespkerdişê heqê nafaka çalakî û aktîvîteyî kerdî. Embazê ma rîyê nînan ra ameyî girewtene.

Pê hêrişan yeno waştene ke komeleya ma bêro îlegelîzekerdene.  Şîdetê vera cinîyan senî poîtîkayêka dewleta nê hêrişê vera ma zî eynî polîtîka ya. Ma vera nê hêrişan zaf hersbîyaye yê, ma do pê nê hersî rêxistinkerde gamanê xurtêran bierzê. Ma semedê wayîrvejîyayîşê Pêkerdişê Îstanbulî çalkîyêke organîze kenê. Pê nê hêrişî wazenê verê na çalakîya ke do 10ê nîsane de bêro kerdene, bigîrê la ma do na çalakîyê dahîna xûrtêr bikerê.''

Endame û avûkata komele Elîf e Tîrenc Îpek zî sereştiş sey dewamê sereştişê 22 gulane hesibna û vat: ''Bê xeberdayîşê îdarekaran û avûkatanê komele sereştiş ame kerdene û qerarê cigêrayîşî zî nêame mojnayene. Seba ke derheqê dosya de qerarê nimitişî esto ma sebebê cipêrsayîşî zî nêmusayî. Cigêrayîşê di saetan dest nîya xeylêk evrakanê fermî û evrakanê projeyan ser.''