Wendekara Zanîngehê Munzurî yê Dêrsimî Gulîstane Doku 5ê çeleyê 2020î ra nata vînbîyaye ya.  Dêrsimo ke 24 saetan pê kamerayan yeno seyrkerdene tede Gulîstane Doku nêameye dîyene. Dewlete bi israrî îdîa kerd ke Gulîstane xo kişta û tim Awbendê Uzunçayirî de gêraye ci. Vergumano verên Zaynal Abarakovo ke babîyê ci polîs o, bi hawayêkê eşkerayî hetê dewleta tirke ra ame pawitene. La keyeyê Gulîstan ame destbendkerdene, derheqê înan de dewayî ameyî akerdene û cezaya pereyî dîyaye înan.

Komîsyonê Edaletê Seba Gulîstane Doku roja verêne ra nata keyeyê Gulîstane reyde têkoşîn kenê. Komîsyonanê Edaletê Seba Gulîstane Doku serrgêra 1. ya vînîkerdişê Gulîstane Doku de venga pêro cinîyan da ke sere de Dêrsim de her ca de vejîyê kuçeyan.

Komîsyonan plansazîya çalakîyanê ke 5ê çeleyî de do bêrê kerdene pare kerdî.

Bernameyê çalakîyan wina yo:

* Dêrsim, Meydanê Seyîd Rizayî, Saete: 12.00

* Adana, Parka Heykellî, Saete: 18.00

* Îzmîr, verê Halkbankî Alsancak, Saete: 17.30

* Îstanbul, verê Operaya Sureyya ya Kadikoyî, Saete: 18.00

* Amed, Ofîs, Saete: 12.30

* Semsûr, Bînaya KESKî, Saete : 13.00

* Bursa, Meydanê Fomara, Saete: 18.00

* Antalya, verê Statuyê Attalosî, Saete: 12.00