Bajarê Hesekê yê Rojawanî de hetê Kongreya Star, Meclîsê Cinîyan ê PYD û Meclîsê Cinîyan ê Partîya Ameyoxê Sûrîye ra serrgêra seyin a Lozanî de Komxebata Cinîyan ame kerdene.

Nizdê 60 cinîyî yê sîyasetmedar û temsîlkarê dezgehan tewrê kombîyayîşî bîyî.Sereka Konseya Rayberdişî ya MSDyî Îlhame Ehmed, Vervatoxa YPJyî Roksane Mihemed, Hemsereka Meclîsê Rayberdişî yê Îdareyê Xoserî yê Rojawanî Bêrîvane Xalid û Hemsereka PYDyî Asya Ebdullah zî tewrê kombîyayîşî bîyî.

Komxebata di rojan vizêr pê parkerdişê peynînameyî qedîyaye. Eşkerayîye de wina ame vatene:

''Rojhelatê Mîyanênî ke Mezopotamya zî tede ca geno, bi kultur, şaran û dînanê cîya cîyayan  zengin bi. Komel pabesteyê yewbînan bi. Tim dostîye û cîranîya verêne ganî bî. La bi mudaxaleyê hêzanê teber û Ewropa ke herême nêsarisnenê, sînorê netew-dewlete ameyî xezkerdene. Nê sînorî goreyê herême nîyê û pê îradeyê şarê herême nêbîyî. Bi îtîfaqanê sey Sykes-Picot, Sevrî ya zî bi Pêkerdişê Lozanî seserrî verî sînorê şarî ameyî bewlîkerdene û pîya bi nê hîsê nîjadperestîye hêzdar bîyî. Rîyê nê sînoran ra dewleta tirke xeylêk qirkerdişî kerdî. Kurdî, êzîdî, armenî, suryanî û xeylêk şarê bînî yê mazlûmî bîyî qûrbanê nê polîtîkayan. Şarê herême verdîyayî pê. Inkey heme şar û dînê yê herême yewbînan ra şik kenê.

Ma sey cinîyan ê Mezopotamya û Rojhilatê Mîyanênî dejê nê polîtîkayanê hêrişkaran û pêkewtişanê herême hema zî ancenê. Şarî sîstemê newtew-dewlete rê mecbur kenê la şar nê sîstemî nêwazeno. Lubnan, Sûrîye, Armenîstan, Sudan, Iraq û Tirkîya de zafê înan cinîyî û domanî şaro feqîr beno qûrbanê nê polîtîkayan. Pê nê îtîfaqan kerd ke qederê şarî bewlî bikerî la şarî qebul nêkerd. Şar tim vera zext û zilmî xover dano. Cinîyan ê serkêşan tim têkoşînê vera qirkerdişan de cayê xo girewt.

Şorişê Cinîyan ê Rojawanî vera nê polîtîkayan vejîya û waşt wa bi haştîye şarî pîya biciwîyê. Têgêrayîşanê cinîyan ê cîya cîyayan mojna ke şarî senî eşkenê pîya biciwîyê. Kultur û dînanê cîya cîyayan ra cinîyî pîya xebiteyenê. Seba ke heme herême bi renganê xo pîya biciwîyo sîstemê Konfederalîzmê Demokratîkî hewce keno. Semedê nê gerek têkoşîn bêro xurtkerdene. Seba ke verê polîtîkayanê qirkerdişî bêro girewtene gerek  Rojhelatê Mîyanênî de konfederasyon û têgêrayîşêkê cinîyan bêro ronayene.''