Kongreya Starî Salona Zana ya Qamişloyî de komxebatêke viraşte û pê eşkerayîyêke da zanayene ke ê safhaya diyîne ya Hemleya 'Îşxal û îmha rê bes o...Ma pîya cuye bipawê' danê destpêkerdene.

Komxebate de bire ameye dayene ke seba ke qirkerdişê cinîyan biqedo ê do çalakîyan bikerê.

Komxebate pê deqayêkê rêzgirewtişî dest pêkerd û Endama Meclîsê Rayberdişî ya PYDyî Foza Yûsif qisey kerd.

Foza vat: ''Temamîya tarîxî de û nika zî yeno waştene ke cinîyî wa bibê kole. Tewirê cîya-cîyayê şîdetê vera cinîyan estê. Bi serran cerganê DAÎŞî cinîyê ma qir kerdî. DAÎŞ seba ke komel teslîm bigêro hêrişê cinîyan kerd.

Merkezê Cigêrayîş û Pawitişê Heqanê Cinîyan ra Mizgîne Hesen û Etîya Yusuf zî ard ziwan ke cinîyî senî eşkenê verê şîdetî bigêrê.  Wird cinîyan zî bale ante ser ke ganî cinîyî vera şîdetî xo rêxistin bikerê û paştî bidê rêxistinanê cinîyan.''

Dima derheqê safhaya diyîne ya hemle de eşkerayîyêke hetê Îbtîsame El Hisên ra ameye wendene.

Eşkerayîye wina ya:

''Cinîyan dinya ser o her warî de vurîyayîşê zixmî kerdî. Cinîyan verî vera sîstemê pederşahîye xo ver da û heqê xo yê xozayî û komelkîyan girewt binê garantî. Ma eşkenê vajê ke sîstemê hemserekîye bi xo naye îfade keno. Şorişê Rojawanî zî pêro dinya de bi îlhamê cinîyan. Coka 30 rêxistinanê cinîyan ê Rojawanî pê şîarê 'Îşxal û qirkerdişî rê bes o, ma do cu û cinîye bipawê' hemleyêke daye destpêkerdene. Hemle 8ê teşrîna verêne ya 2020î ra heta 11ê çeleyê 2021î Rojawanê Kurdîstanî de dewam kerd.

Hemle armanc kerd ke herêmanê îşxalkerdeyan de sûcê dewleta tirke û cerganê ci eşkera bikera. Nê herêman de peymanê mîyanneteweyî yenê binpaykerdene. Demografîya herême yena vurnayene. Tarîx û xoza yenê texrîbkerdene. Nê hêrişî erjanê merdimîye kenê binpay.''

Eşkerayîye bi sloganê 'Cinîye, Cuye, Azadîye' qedîyaye.