Festîvala Cinîyan a Sakîne Cansiz a 10. emser 23yê hezîrane de warê Kasernenarealî yê Zurichî de do bêra kerdene. Festîvale do bi şîarê 'Bi Jin, Jiyan, Azadî; Ver Bi Şorişê Cinîyan' serkêşîya TJK-E de serûber bena.

Hemsereka Konseya Kurdan a Demokratîke ya Swîsre (CDK-S) Selma Surer û Endama Komîteya Amadekarîye ya Festîvale Ozene Aytaç derheqê festîvale de ANFyî rê qisey kerd û venga pêro cinîyan da ke wa tewrê festîvale bibê.

Hemsereke Selma Surer ard ziwan ke ê armanc kenê ke festîvala 10. de beşdarîyêka pîlêre est biba û vat: ''Sere de cinîyê kurdî ma venga pêro cinîyan danê ke wa tewrê festîvale bibê û dosta, xisim, merdim û embazanê xo zî bîyarê. 20 dezgehê cinîyan ê xerîbî do tewrê festîvale bibê.  Çunke embaze Sakîne Cansiz têkoşînê cinîyan de wayîra cayêkê girîngî ya. Festîvale de bernameyê seba domanan, xeyma kaykerdişî, xeyma dengbêjîye, panelî do est bê. Ma do festîvalêka ke layîqa Sakîne Cansiz a bikerê.''

Ozene Aytaç zî îfade kerd ke amadekarîyê festîvale qedîyayê û vat: ''Ma rê embaze Sakîne û fikrê aye zaf muhîm ê. Ma sereberz ê ke festîvalêka winayêne virazenê. Seba ke Sakîne Cansiz têkoşerêka enternasyonalîste bîya xeylêk rêxistinanê cinîyan û partîyanê sîyasîyan amadekarîyan de cagirewt. Ma pê bawer ê ke emser embaze Sakîne hîna hol do bişinasîya.''

Meymanê festîvale

Hunermendî Bermal Çem, Jin MA, Yelda Abbasî, Medî, Koroya Jinan a Baselê, Koroya Zarokan a Winterthur, Elenora, Govend û Komên Govendê yên Jinan do festîvale de vejîyê sehne ser û dengbêjî zî xeyma xo de kilaman vajê.