Vera alozîya Başûrê Kurdîstanî her roje nêrazîbîyayîşî zêdîyenê. Mayanê Haştîye zî laçikê xo yê sipîyî eştbî war û tewirê xo mojnabi.

Meclîsê Mayanê Haştîye yê Amedî ra Havva Kiran (65) zî tewra çalakîya laçika sipîye bibî. Dayîke Havva heta ewro 5 rey ameya destbendkerdene û derheqê aye de 106 tehqîqatî dîyayê destpêkerdene. Reyna zî Maya Haştîye Havva haştîye ra fek vera nêdana.

Dayîke Havva verî zî seba yewîya kurdan şibî Herêma Kurdîstanî.

Dayîke Havva vana: ''Wexto ke Kurdîstano Federe ronîya ma vatêne qey azadî û demokrasî do aver şorê la wina nêbi. La înan seba menfaatanê xo xebat kerd û seba ke yewîya kurdan awan nêba destê gêmarinî girewtî xo mîyan. PDK bîyo esîrê dewletan ê bînan. Çira ê yewîya kurdan awan nêkenê? Çunke o çax menfaatê înan zerar vînenê. Nika ma sey awe û nan hewceyê yewîye yê. Wexto ke DAÎŞî hêrişê Hewlêrî kerd domananê nê şarî hetkarîya şarî kerde. Ewro zî înan dormeyê  nê domanan girewt. Eke way û birayê to seba to xebitîyenê ganî ti zî seba înan mesuldarîya xo bikerî.''

Dayîke Havva derheqê girîngîya laçika sipîye de wina vat: ''Wexto ke eşîran şer kerdêne dadîyan laçikê sipîyî eştêne war û şer qedîyayêne. Laçika sipî verê şer û gonîye gêna. Seba ke Birêz Barzanî û ê bînî verê birakûjî bigêrê ma laçikê xo yê sipîyî eştî war.  Ma wazenê yewîya xo awan bikerê, birakujî biqedo. Wa destê gemarinî Başûrî ra vejîyê. Ma reyna venga Birêz Mesûd Barzanîyî danê ke destê xo bidê wayûbirayanê xo ke yewîya kurdan awan biba.Ganî her kes seba Konferansê Yewîya Neteweyîye xîret bikero.''