Mayanê ke vernîya Zîndanê Bakirkoyî de seba bale biancê grevanê vêşanîye û rojeyê mergî ser waştîbî nobete bigêrê, roja Panşeme û Îneyî mayî ameybî destbendkerdene û ameybî berdene bi Mudurîya Şûbeyê Asayîşî yê Emnîyetê Vatanî. Tîya mayî hem rastê bi zorî sehnayîşê viranî ameyî û hem zî rastê heqaretan ameyî.

Mayê ke mecbûr mendî Roja Mayan hucrayanê xo de bêhewa ravêrnê, seba ke ez zî amîbîya destbendkerdene ma yewbînan Mudurîya Emnîyetî ya Stenbolî de dî. Seba ke Şûbeyê Asayîşî de ca çinbi ma sey “meyman” 4 rojî şûbeyê Mucadeleyê Hemverê Terorî de (TEM) şertanê xiraban de mendî. La rixmê nê şertan de zî mayan seke nobetanê xo yê vernîya zîndanan sereyê înan de mexmelê sipîyî, deyîrî vatî û rixmê hewayê biqesawetî de yewbînan rê moral dayêne. Gama ke înan ez dîya, ez virare kerde û çîyê ke ameyî sereyê înan qal kerdî.

Bi Zorî Waşt ke Bikerê Viran û Dîmenê Mi Biancê

Mayan de hem şikîyayîş û hem zî hêrsê bi zorî sehnayîşê viranî estbi. Kûmrû Akgula ke rastê nê bicaardişê anorşikitoxî amîya ard ziwan ke polîsan ê cinîyan waşto a cilanê aye ci ra vejê, bikerê virane. Gama ke a nê qebûl nêkerdo 6 polîsî kewtê aye ser. Maye Akgule derheqê qewimîyayîşî de wina vat: “Polîsan hetêk ra waştêne ke mi viran bikerê, yewna polîse bi telefonê destî waştêne ke dîmenê mi bianco. Gama mi no dî heta mi ra ame ez qîraya û mi vat heta ke ez sehnayîşê viranî qebûl kena ez xo bikişî hîna rind o.”

Fadîme Keskîna ke a zî mîyanê mayanê ke vernîya Zîndanê Bakirkoyî de amîbî destbendkerdene vat a zî rastê zordayîşê sehnayîşê viranî amîya. Keskine vat 7 polîsan xo eşto serê aye ke a viran kerê.

Wa Çew Ma ra Bêvengîye Nêpawo

Maya Fatma Yildirima ke 16’ê Kanûne ra nata Zîndanê Baybûrtî yê Tîpê E’yî de grevê vêşanîye de ya Razîyete Yildirime vat ê verê Zîndanê Bakirkoyî ra bi derbwerdiş û erd ra kaşbîyayîşî ameyê destbendkerdene û wesayîtê nezaretî de zî rastê heqaretan ameyê.

Mayê ke bi kerdişê deyîranê Kurdkîyan rixmê “Olurum Turkîyem” o ke heta saetanê ereyî yê şewe şûbeyê TEM’î de cenîyeno û heme şertanê teberê merdimîye rojeyê xo gênê, nimajê xo kenê û vat ke ê do bi qerardarîye xoverdayîşê xo bidomnê.