23 serrî yo ke Mayê Şemeyî seva aqûbetê kesanê ke nezaret de ameyê vindîkerdene bêro zanayene mucadele kenê. Nê hewteyî de parlamenteranê HDPyî ra Oya Ersoy û Alî Kenanoglu û parlamenterê CHPyî Sezgîn Tanrikulu tewrê çalakî bîyî. Hetêna ra endamanê Partîya Çepe ya Qibrisî, Sereka ESPyî ya Bajarê Stenbolî Pinar Turke û şaîr û nûştoxan zî mîyanê çalakî de cayê xo girewtî. Eşkerayî hetê waya Hasan Ocakî Masîde Ocake ra amî wendene.    

'DEWLETE HÊZ SEVA NEFRET Û ŞIDETÎ ŞUXULNENA'

Ocakî hemverê ablûkaya polîsî de reaksîyon ramot û ard vîrî ke hêzê dewlete hemverê merdimanê vindîyan de hetê îdarekaranê ci ra sey wasiteyêkê  nefret û şidetî yeno iuxulnayene. 

HÎKAYEYA TOSUN Û AYDEMÎRÎ

Ocake qalê hîkayeyanê Fehîm Tosun û Huseyîn Aydemîrî kerd û vat ê her di zî heman roje de gîrîyayî binê nezaretî û dewamê ci de vat: „Fehîm Tosun û Huseyîn Aydemîrî pîya arayî kerdebî. Dima ra Tosun şi keyeyê pîyê xo ke Stenbol/Avcilar de bi. Hela şanî hetê polîsanê bisîleh û bêtêlan ra ame ardene tepiştene û ame ardene bi verê keyeyê ê. Gama ê cinî û domanê xo dîyî qîra û vat: „Înan ez girewta nezaret û do mi bikişê“.  

Ocake vatişê xo wina dewam kerdî:

 „Înan ra hendî xeberêk nêgirîya. Dima ke zereyê welatî de rayîrê huqûqîyî xetemîyayî ma muracatê Mehkemaya Heqanê Merdiman ê Ewropa kerd. Hukmatî pawitişê xo yê 2003 yê Mehkemaya Heqanê Merdiman ê Ewropa de (AIHM) vat ke „Ma do seva ke cigêrayîş bi zelalî dewam bikero çi dest ra bêro bikerê û tedbîran bigîrê. Labelê heta ewro dosyayanê Tosun û Aydemîrî de cigêrayîşêko aktîf nêame kerdene.“

Ocake vat: „Heta waştişê ma yê heqîqet û edaletî bica mero ma do cigêrayîşê vindîyanê xo ra û mekanê xo Galatasaray ra zî fek vera medê.

'AKP ŞERMEZAR KERD, VAT „MA DO HESAB BIPERSÊ'

Cinîya Fehîm Tosunî Hanim Tosun a ke eşkerayî ra dima heqê vatişî girewt, bi şermezarkerdişê ê hetanê ke Meydanê Galatasarayî Mayanê Şemeyî rê kerdê qedexe dest bi qiseykerdişî kerd. Hanime vat: „Ma 23 serrî yo ke ê meydanî de yê û zirarê ma nêresayo çewî. Ma heqdar ê û seva edalet û huqûqî yenê têhet. Heqê çewî çino ke binê nezaretî de kesî vindî bikero. Ma hesabê nê erkdaran ra persenê.“  

Ayşe Tepe ya waya muxabirê Ozgur Gundemî Ferhat Tepeyî hemverê qedexeyê keyfîyî de reaksîyon ramot û vat: „Nê qanûnê xo yê bingeyênî rê zî hurmet nêramojnenê.“

AMED Û ÊLÎH DE CIGÊRAYÎŞÊ EDELATÎ: TIRKÎYA WELATÊ SÛCÎ YA!

ÎHD û merdimê vindîyan Amed û Êlîh de cigêrayîşê xo yê edaletî domnayî. Çalakîyan de aqûbetê Nazim Gulmez û Şehmuz Înselî ame persayene.