Meclîsê Cinîyan ê HDPyî netîcenameyê kombîyayîşê xo yê 29ê teşrîna peyêne eşkera kerd. Netîcename de ame vatene ke rêxistinîyê netewe-dewlete raştê serewedaritişê 'jin, jiyan, azadî' yê cinîyan ameyê.

Netîcename wina yo:

''Serewedaritişê Îran û Rojhelatê Kurdîstanî ewro pêro dinya ra vila beno. Polîtîkayê dişmenîya vera cinîyan ê îqtîdarê AKP-MHPyî ê rejîmê Îranî ra cîya nîyê. Cinîyê kurdî reyna bîyî hedefê îqtîdarê AKP-MHPyî yê serdestîya camêrdan. Hêrişê destbendkerdişî yê vera cinîyan hêrişanê vera Rojawan û Şingalî ra cîya nîyê. Îqtîdar bi nê hêrişan keno ke weçînayîşan de ser bikewo. Ma krîmînalîzekerdişê têkoşîn û serewedaritişê cinîyan qebul nêkenê û wayîrê nê têkoşînê 'jin, jiyan, azadî' vejîyenê.

Îqtîdar keno ke tecrîdê Îmraliyî pêro zîndanan ra vila bikero. Zîndanî bîyê merkezê polîtîkaya tecrîdî. Sûcê vera Garîbe Gezer zî îsbatê ney ê. Xora tewirê Birêz Ocalano ke pêvînayîşê bi CPTyî red kerdo, tewirê vera polîtîkayanê şerî yo. Vera bêhuqûqîya sîstemê tecrîdî yê Îmraliyî ma reyna veng danê ke cade Ocalan de pêvînayîş bêro kerdene. Ma do vera tecrîdî xoverdayîşî rê dewam bikerê.

Îqtîdarê AKP-MHPyî destûrê polîtîkayanê şerî û şuxilnayîşê çekanê kîmyewîyan NATOyî ra gêno. Îqtîdar pê krîz û kaosan şino weçînayîşî. Îqtîdarî hêrişê Taksîmî xo rê kerd bahane û hêrişê Rojawanî kerd. Nê hêrişî vera şaran, cuya hempare ya cinîyan û şorişê cinîyan ê Rojawanî yê.

Krîzo ekonomîk zî semedê şer û şîdetî ra qewimîyeno. Cinîyê ke vera xizanî, bêkarî û vêşanîye xo ver danê, yenê kerdene hewcedarê camêrdan. Keda cinîyan yena werdene. Xîret kenê ke cinîyan keye de ronişnê. Cinîyî 'budçeya têdûşte' wazenê.

Wird blokê nikayênî (îtîfaqê cumhur û îtîfaqê miletî) mîyanê sîstemê serdestîya camêrdan de cagênê. Ma mecburê nê wirdemînan nîyê. Vera krîz û xizanîye xeta ma  rayîro hîrêyîn o. Ma vera qirkerdiş, şer û tecrîdî ê do rayîrê hîrêyînî awan bikerê.''