Rewşen Mêrdîne Sterk TV’yî de beşdarê programê  Rojava Jin biye û rojdem  ercna. Endama Koordînasyonê KJK’yî Mêrdîne bi pîrozkerdişê 8’ê Adare dest bi qiseykerdişê xo kerd û wina va: “8’ê Adare de cadde û rayîrî bi renganê cinîyan ameyî xemelnayene, la çiyo muhîm o yo ke ganî mucadeleyê cinîyan her roje bêro dayene. Cinîyan rê her roje hîna zêde hêrişî yenê kerdene. Naye ra zî ganî her roja ma bi xoverdayîş û mucadeleyî bo.“

Mêrdîne ard vîrî ke DAÎŞ bi destê cinîyan ê YPJ’yî ameyo qedênayene û wina dewam kerd: “Emser bi serkêşîya cinîyan ê Kurdan cayanê sey Dêrazor, Teqba de zî 8’ê Adare ame pîrozkerdene. Rêxistin çi beno bibo, la azadîya komelî bi destê cinîyan bena. Senî ke Rojawan de, bi serkêşîya YPJ’yî DAÎŞ ame qedênayene, xoverdayîşê Leylayan zî do peynîya AKP-MHP’yî bîyaro. Her dewlete ya ke qaşo xo demokratîk vînena de her roje cinîyî yenê qetlkerdene, yenê tacîzkerdene. Seba ke qetlîamê sey Şengalî nêrê kerdene, ganî ma mucadeleyê xo hîna aver berê. “

MA DO BI ŞIKITIŞÊ TECRÎDÎ XO PAK BIKERÊ

Tecrîdê Îmralîyî, pêro şaranê Tirkîya rê zî yeno kerdene. Seba ke tecrîd bêro şikitene, ganî ma hîna zêde vengê xo bivejê. Bi xoverdayîşê Rayberîye û şarê ma, dişmen do nêreso armancê xo. Tecrîd ke bêro şikitene, bêgûman şarî zî benê azad. Leyla Guvene vera Rayberîye xo rexne kerd û ma zî xo rexne kenê. Ma do bi şikitişê tecrîdî rexneyê xo bîyarê ca û bibê pak.“

Mêrdîne qiseykerdişê xo de bale ante hêrişanê hukmatê Başûrê Kurdîstanî yê vera PJAK’î ser û no derheq de zî wina va: “Ewro Başûrê Kurdîstanî de bi 8’ê Adare rengê cinîyan hîna zêde ameyî asayene û no zî bi saya PJAK’î bîyo. Nê serkewtişê PAJK’î nêameyê qebulkerdene ke hêrişê merkezê ci bîyo. Ma pê bawer ê ke do xoverdayîşê şarê Başûrî û ê Şêladize bidomîyê. Ma do bi ruhê Leylayan û bi adirê Mazluman Newroze pîroz bikê.“