Sekretera Cinîyan ê Konfederasyonê Sendîkayanê Kedkaran (KESK) Gulîstane Atasoy derheqê zor û zehmetîyan de ke warê karî de vejîyenê verê cinîyan û mobbîngê vera cinîyan ANFyî reyde qisey kerd.

Beşêkê qiseykerdişê Atasoye wina yo:

''Îqtîdarê AKPyî ra dima tedaya vera cinîyan bîye zêdêr. Bi Rewşa Îstîsnayîye polîtîkayanê rejîmî reyde dewirêkê neweyî dest pêkerd. Ma sey cinîyan warê karî de na teda 3 serran ra nata hîna zêde vînenê. Bi krîzê ekonomîkî ma hîna zêde nê meseleyan reyde rî bi rî mendî.

Kesê ke nêeşkenê îsbat bikerê ke ê terefgîrê AKPyî yê karî ra yenê vetene. Ma prosesêkê winasî de yê. Na rewşe tesîrê rêxistinbîyayîşî zî kena, bena semed ke têkoşîn û karê wayîrvejîyayîşê destkewteyan nêrê kerdene.

Cinîyî benê hedefê cîyatîya cînsî û şîdetî. Babetê ke tewr zaf cinîyî gerreyê ci kenê; teda, şîdet, mobbîng û cîyatîya cînsî yê. Verê cû 2 cinîyî mobbîngî ra semed xo kiştbi. Wexto ke ma qala mobbîngî kenê ma nêeşkenê ke ney polîtîkayanê îqtîdarî ra cîya bierjnê. 

Bi taybetî mîyanê cinîyanê ciwanan de û cinîyanê şaristanijan de rêjê bêkarîye resa se ra 40.  Cinîyî tewrê karî benê la senî benê. Senî yenê xebitnayene, no zaf girîng o? Bi hawayêkê bêasayîşî tewrê karî benê. No zî yeno manaya karêkê erjanî. 

KESKî heta nika xîret kerd ke vera meseleyanê ke warê karî de vejîyenê verê cinîyan têkoşîn bikero. Ma do têkoşînê xo dewam bikerê. Labelê rastîyêja winasêne zî esta;  wezareto ke muxatabê ma yo polîtîkayêka xosere vera cinîyan xebitneno. 

Hanî wezaretêkê cinîyan bibo ke bieşko polîtîkayanê derheqê cinîyan de kar bikero.''