Hemşaredara Nisêbînî ya verêne û Vervatoxa TJA Ayşe Gokkana ke sey rehîne zîndan de tepişîyena, roniştişê dewaya ci siba yo. Hemsereka HDPyî ya Nisêbînî Şîndare Akinci derheqê têkoşînê Ayşe Gokkan de ANFyî rê qisey kerd.

Şîndare Akinci ard ziwan ke Ayşe Gokkan her çî ra ver wayîra tewirêkê cinîye yê xurtî ya û vat: ''Ayşe Gokkan wextê hemşaredarîya xo de şarê Nisêbînî de têkilîyêka xurte naye ro û na têkilîye ewro zî rixmê şertanê zîndanî dewam kena. Ayşe pê xebatanê xo, kesayetê xo û metodanê xo şarî de bîye hemhal. Ma komelêko xoverdayox ê la tay hetê ma yê feodalî mendê. Ayşe Gokkan bi tewirê xo sînorê wişkî yê mabênê camêrd û cinîyan nerm kerdî.''

Şîndare vist vîrî ke têkoşînê azadîye yê cinîyan ê Nisêbînî wextê Ayşe Gokkan de zaf pîl bîyo û Nisêbîn sey şaristanê cinîyan ameyo îlankerdene. Şîndare vat: ''Wextê şaredarîya Ayşe de kooperatîfê cinîyan û keyeyê cinîyan ameyî akerdene. Wextê aye de têkoşînê cinîyan zêdîya û cinîyî bi xurtî rêxistin bîyî. o çax tacîz û tecawuzî kêmîyayî. La dima 2019 de qeyûmî îradeyê şarî xesp kerd û hêverî destkewteyê cinîyan kerdî hedef. Qeyûm keno ke ferasetê camêrdan reyna serdest bikero, tesîrê şarî bikero û Keyeyê Cinîyan bivurno. Bi qeyûman Mêrdîn û Nisêbîn de tacîz û tecawuzî zêdîyayî.'' 

Şîndare Akinci ard ziwan ke şarê Nisêbînî hesreta ê îdarekeran kenê ke erjanê têkoşînê azadîye zerrîya xo de kirişenê û vat: ''Ayşe Gokkan bi kesayetê xo vîrê şarî de yo û şarê Nisêbînî ci rê zaf hûrmet keno. Qeyûmî îradeyê ma xesp kerd la mumkîn nîyo ke vîrameyîş û xoverdayîşê Ayşe Gokkan çin bikero. Sey cinîyan ê Nisêbînî ma do tewrê roniştişê embaze Ayşe bibê. A zîndan de zî têkoşînî rê dewam kena. Xora mumkîn nîya ke a mîyanê çar dêsan de bêra vindarnayene.''