Namzeda ke Çêrmûg de bi prensîbanê xo fehmê kanî rijnayê

Makbule Çakine, seba ke xebatanê partîya sîyasîye de ca nêgêro, hîna ke 15 serrî bîya ameya zewecnayene. Çakine bi prensîbanê xo, Çermûg de îmzaye eşta xeylî çiyanê neweyan û bi ferasetê xo yê demokratîkî xeylî çiyî vurnayê.

Makbule Çakine serra 1969’î de, qezaya Amedî Erxenî de ameya dinyaye û hewna ke 5 mengîye bîya maye ra visnaya û daya maya maya aye. Her çiqas ke eynî bajar de biciwîyê zî Çakine keyeyê xo û maya xo bi serran nêdîya. Perwerdeyê xo yê heta lîse Erxenî de kerdo temam û  hîna ke wendekare bîya, mucadele nas kerdo û kewta zereyê xebatanê sîyasîyan. Wexto ke 15 serreyî bîya, Erxenî de kewta çalakîya grevê vêşanîye. Naye ser pîrika aye a yew keso ke qet nêşinasnayo de zewecnena.

Çakine zewac ra dima şîya Çermûg û uca de zî mucadeleyê xo domnayo. Vera desteserîya eşîran a feodale de her çiqas ke zor û zehmetîyan bianco zî, peyser game nêerzena û zereyê partîya sîyasîye de ca gêna. Çakine mabênê serranê 2005- 2006’î de, sey yew cinîye serekîya partîye kerde û no Çermûg de çîyêko nimûne bi. Nika zî namzeda hemserekîye ya HDP’yî ya.

15 SERREYÎYA XO DE AMEYA ZEWECNAYENE

Makbule Çakine wina qisey kerd: ”Ez tim zereyê mucadeleyê cinîyan de bîya. Erxenî de 10 rojî kewta grevê vêşanîye. O wext 15 serrî bîya. Grevê vêşanîye ke qedîya ez şîya keye. Xalê mi ber akerd û mi ra va ‘maya mi to zewecnaya’. Mi va qey yarîye keno. Pîrika mi welatperwere bîye, la goreyê aye ganî cinîyî nêkewê mabênê xebatan û ci ra dûrî vindê. Seba ke mi partîya sîyasîye ra dûrî bigîro, ez zewecnaya. La mêrdeyê mi û keyeyê ey, vera mi nêvejîyayî û mi xebatê xo Çermûg de domnayî. O wext Çermûg de cinîyî nêvejîyêne teber û xebatanê partîyanê sîyasîyan de ca nêgirewtêne. Ez tena bi sereyê xo şîyêne Amed û ameyêne û her kesî naye ser qisey kerdêne. Bi doliman şîyî hetê pîyê mêrdeyê mi û gerreyê mi kerd.” 


HEDEFÊ MI RIJNAYÎŞÊ SISTEMÊ FEODALÎ YO

Qezaye de cinîya ke tewr verî bîya sereka partîya sîyasîye û reyna endama meclîsê şaredarîye ez a. Ez nêtersaya û mi peyser game nêeşte. Ez nêweşxane de kewta kar la ameya eştene, TEDAŞ de kewta kar, ameya eştene. Seba ke Çermûg ra biremî her çî cerebna la mi linge şanite erd û ez menda. Hedefê mi o yo ke ez tîya de sîstemê feodalî birijna. Wezîfeyo ke partîya mi dayo mi, ez bi hawayêkê cidîyî biyara ca û do biba layîqê partî û şarê xo.”

BAWERÎYA MI ESTA, MA DO BIBÊ SERKEWTE

Makbule vana çiqas ke dest ra bêro kena ke cinîyan bivejo teber û beşdarê xebatan bikero. Çermûg de cinîyan rê her ca girewte yo û nêeşkenê bivejîyê teber û Makbule zî seba ke cinîyan rê ca bêro akerdene xebetîna û wina vana: ”Ez vera zîhnîyetê feodalî yê camêrdîye de mucadele kena û seba naye zî bîya namzede. Cinîyî do ser bikewê. Ma do dewe bi dewe bigêrê û her kesî ra paştdarîye biwazê. Ma do xo û partîya xo HDP’yî bidê şinasnayene. Şaredarîya Çermûgî bi serran o ke destê AKP’yî de ya la qet xizmet nêameyo kerdene. Şarê ma naye vîneno. Ma do biresê armancê xo. Ma do 31’ê Adare de bibê serkewte.”