Rojnameyê cinîyan Newaya JIN ke 2005 ra heta nika bi perîyodê aşmaneyî Ewropa de weşanîyeno hûmara ci ya 164. vejîyaye.

Rojname hûmara xo ya Teşrîna peyêne de Konferansê Cinîyan ê Mîyan-neteweyî ke bi temaya “Şorişo ke Hewna Yeno Awankerdene” 6-7ê Teşrîna verêne de Frankfurt de ame viraştene ser o vindeno.  

WEXTÊ BERZKERDIŞÊ MUCADELEYÎ YO

Rojdemo bîn ke Newa hûmara xo ya 164. de ser o vindeno zî ‘25ê Teşrîna verêne Roja Mucadeleyî yê Şidetê Hemverê Cinî’ yo. Çîgdem Dogu ya ke selahîyetdaranê Têgêrayîşê Cinî yê Kurdan ra yew a sebebanê meseleyê cinî ser o vindena, awankerdişê sîstemê azadîya cinî ana vîrî.

Aktîvîstê Têgêrayîşê Cinî yê Kurdan Şukran Sîncer û Dilda Roje zî sebebanê Ewropa de kişîyayîşê cinîyan gênê xo dest. 

 ‘WEXÊ KURDAN’

Endama Konseya Serekî ya Pêroyîye ya KCKyî Zilar Stêrke zî derheqê şertanê vejîyayîşê Têgêrayîşê Azadîye ya Kurdan ê 27ê Teşrîna peyêne ser o vindena û qedera sîyasîye ya kurdan a seserra newîye ana ziwan. Stêrke prosesê mucadeleyî yê nîm seserreyî sey ‘Wextê Kurdan ê bi merkezê cinî’ name kena.

Heman babete ser o aktîvîsta Têgêrayîşê Cinî yê Kurdan ê Ewropa ra Xanim Engîzeke zî vindena.

 ‘OCALAN XÊZA SÛR O’

Rojnameyo ke bi hawayêkê hîrayî ca dano fikranê cinîyan ê derheqê tecrîdê serê Rayberî Şarê Kurdî Abdullah Ocalanî ano ziwan ke seva ciwanan birêz Ocalan xêzêka sûr o. Cinîyê ciwanî CPT, KE û PE rê reaksîyon ramojnenê û ciwananê kurdan rê zî vengdayîşê ‘Serî Hilde’ kenê. 

DESTANÊ XOVERDAYOXAN

Newa hûmara xo ya 164. de ca da roportajê bi Denîz Bîlgîne ke nûştoxê kitabê “Varanê Hewrî” ya. 

Rojnameyî rîpelê xo yê Cimat Cuye de ca da nûşteyêkê vîrardişî yê Medya Doze ke derheqê gerîlaya YJA-STARî Jindar Ezgî (Pinar Yildirim) de nûşta. Doze ana ziwan ke Jindare “fermandarêka serewedartişê hemverê raştîya qirkerdişî ya”.

Rojname de heman wextî de ca dîya nûşteyanê Nurhaq Gulbahar, Çarçel Engîzek û Evîn Zîlane.