Fermandara Pêroyî ya YPJyî Newroze Ehmed serebûtê sîyasî, leşkerî û komelkî yê Rojawanî yê 2020î ercnayî û plansazîya 2021î rê behs kerd.

Newroze Ehmed pare kerd ke her catê dinya, sîstemê îqtîdar şexsê cinîyan de îmha, qirkerdiş û bêîradeverdişkeno giranêr. Newroze vat: ''Rewşêka winasêne de hêrişî zî zêdîyayî. Seba ke ma xo biresnê cinîyan ê xoverdayox û têkoşeran, seba ke ma cinîyan rêxistin bikerê plansazîyêke kerde. Nê hêrişî hêrişanê DAÎŞî ra wetêr ê. Xeylêk cayanê dinya û xeylêk neteweyan ra cinîyî tewrê hêzanê ma benê. Naye ra ma eşkenê tesîr û netîceyan biercnê.

Emser zî plansazîyêka ma esta ke ma xo biresnê nê hêzan. Labelê hêrişê îşxalî, gefê vera herême û nêweşîya Korona ma rê bîyî asteng. Êyê ke waşt bêrê herême nê sebeban ra nêeşkayî bêrê herême. La bi mesajan û rayîrê teknîkî ma xo resna pêro cinîyanê dinya. Xora no qîm nêkeno. Ganî ma xo zêdêr biresnê cinîyan û çunke cinîyê bingeyêkê Şorişê Rojawanî yê.''

Newroze Ehmed da zanayene ke înan serra 2020î de xeylêk netîceyê giranî dîyî û vat: ''Şarê ma nêçarîye ra koç kerd. Vera Efrîn, Til Ebyad, Serêkanîyê û herêmanê bînan hêrişî ameyî kerdene û hema zî nê hêrişî dewam kenê. 

Ma serra 2020î xo pey de verdaye la têkoşînê ma dewam keno. Serra 2021î seba têkoşînê ma serrêka girîng a. Ma seba serra newîye amade yê. Ma rêxistinî, hîşmendî û waştişê komelî zî vînenê. Coka ma verî armanc kenê ke herêmanê îşxalkerdeyan azad bikerê û xîret bikerê ke şarê ma abigêra waranê xo. Seba YPJ wezîfeyê ma yo verên o ke ma vera hêrişan şarê xo û erdê xo bipawê. Serra newîye de cewabê hêrişan do bêro dayene. Ma amadekarîyê xo kerdî temam. Ma do kêmasîyanê xo zî safî bikerê.

Reyna armancanê ma ra yo ke ma do Îdareyê Xoserî bipawê. Modelê çareserîye yo ke Şorişê Rojawan de yeno caardene seba pêro Sûrîye û Rojhelatê Mîyanênî derbazder o.Ganî ma nê modelî zî bi xurtî bipawê û pêro dinya ra vila bikerê. No zî bêguman rayberîya ciwan û cinîyan de beno. Seba serra 2021î hêvîya ma pîl a. Ma hetê sîyasî û leşkerî ra bi hêzêkê xurtêrî, bi qerardarî û îradeyêkê zixmî dest pê serra 2021î kenê. Hêrişî zî ancax ma xurt kenê.

Rayberîya ciwan û cinîyan de ma eşkenê seba cinîyanê dinya têkoşînê xo de ser bikewê. Ganî ma emser Rayber Apo, kurdan û şarê herême azad bikerê û şoriş bikerê malê dinya. Ma do seba ney têkoşîn kenê. Seba erjanê xo, bedelanê xo, şehîdanê xo ma do wezîfeyanê xo bîyarê ca.''