Koordînasyonê PAJKî keyepelê xo ser de derheqê Qirkerdişê Parisî yê 23yê Kanûne de eşkerayîyêke daye.

Eşkerayîye wina ya:

''Ma serkêşa ercîyaye ya têgêrayîşê azadîya cinîyan ê Kurdîstanî embaze Evîne Goyî, hunermend Mîr Perwer û welatperwerê ma yê ercîyayeyî Abdurrahman Kizilî bi hûrmetî yad kenê û keyeyanê înan û şarê Kurdîstanî rê serweşîye, birîndaran rê şîfaya xeyrîne wazenê. 

Îqtîdarê AKP-MHPyî yo faşîsto ke no qirkerdiş organîze kerdo do hêrsê şarê kurdî de bifatisîyo. Narey Fransa do nêeşka qirkerdişê Parisî yê diyînî bikera qurbanê menfaetanê xo. Fransa ganî hem nê qirkerdişî hem zî Qirkerdişê 9ê Çeleyê 2013î eşkera bikera û edaletî bîyara ca. Ma şîdetê polîsanê Fransa û tedayanê sîyasîyan ê Almanya yê vera dezgeh û kesayetanê kurdan zî şermezar kenê.

Nê qirkerdişî de şexsê embaze Evîne Goyî de têgêrayîşê azadîye yê cinîyan ê kurdan ameyo armanckerdene. Embaze Evîne her warê têkoşînê Kurdîstanî de milîtanîya azadîye û serkêşîya têkoşînî kerde. Embaze Evîne Goyî vera qirkerdiş, asîmîlasyon û sîyasetê îmga meşaleyan azadîye ya şarê kurdî ya. Ewro pêro kurdîstanijî her ca de serê rêçê aye de payan ser de yê. Ma nê tewirê rûmetênî yê şarê kurdî, cinî û ciwanan, dostanê ma selam kenê. 

Şarê kurdî û rayaumûmîya demokratîke hema destpêk de bêguman dewleta tirke sey mesuldara nê qirkerdişî dîye. Dewleta tirke key firsend bivîna her ca de dişmenîya xo ya vera kurdan mojnena û hêrişê kurdan kena. Dewleta tirke hem Kurdîstan de bêmabên şerî rayîr a bena hem zî Ewropa de vera kurdan polîtîkaya şîdetî ana ca. Paştdayîşê Ewropa yê bi dewleta tirke zî sûcanê şerî yê dewleta tirke rê hemkarî ya. Êyê ke nê qirkerdişî rê zemînêkî pêşkêş kenê polîtîkayê Yewîya Ewropa, NATO, Îngilîstanî yê vera kurdan ê. Sîyasetê komployê vera Rayber Apoyî de israr kenê û PKK mîyanê lîsteya terorî de verdenê.

Sere de ê Îngilîstan, Almanya û Amerîka ma eşkerayîyanê şermezarkerdişî yê welatanê Ewropa manadar vînenê la ma venga înan danê ke vera kurdan sîyasetê dişmenîye ra fek vera bidê û bi wijdanî û demokrasî têbigêrê. Polîtîkaya ke do haştî, aramî û asayîşî rê xizmet bikera wedaritişê polîtîkaya tecrîdî ya Îmraliyî û polîtîkaya şerî ya vera kurdan o. Qirkerdişê Parisî serebûtêko ferdî yan zî hêrişêko nîjadperest nîyo. No hêriş sûcê şerî yo ke fermanê ci hetê şefê faşîstî Erdoganî ra dîyayo. 

Hêrişê serdest û kolonyalîstan do nêeşkê çimanê şarê kurdî û cinîyan bitersnê. Rixmê dişmen û xayînan Rayber Apoyî kurdî newe ra ganî kerd û şexsê Sarayan, Evîn Goyiyan, Bêrîvan Zîlanan, Delal Nurhaqan, Nagîhanan û Jîna Emîniyan de cinîya azade afernaye. Ewro qederê pêro parçeyanê Kurdîstanî bîyo yew. Bi ruhê yewîya neteweyîye ewro bi mîlyonan kesî çar parçeyanê Kurdîstanî û Ewropa de payan ser de yê. Na seserre do biba seserra cinî û kurdan. Ma sond werdo ke dişmenîya dewleta tirke û xayînanê hemkaran bikerê binerdê tarîxî.

Şarê kurdî û dostê ma do serkêşîya cinîyan ê kurdan de bi îradeyê azadîye qesasê nê qirkerdişî bigêrê. Sey teqîbkerdoxanê na dewa ma do destûr nêdê ke no qirkerdiş bêro mîyankerdene. Têgêrayîşê ma yê cinîyan, şarê ma bihêz ê. Şarê kurdî û cinîyê kurdî her ca de xo bipawê, rêxistin bikerê û têkoşînê azadîye vila bikerê û peynî de do azad bibê. Şexsê Evîne Goyî, Mîr Perwer û Abdurrahman Kizilî de ma pêro şehîdanê xo yê şorişî reyna bi rêzdarî yad kenê. Bi hêzê şehîdan ma do têkoşînê xo heta serkewtişî bîyarê ca.''