PAJKî cinîyê şorişgêrî yê kurdî yê ke Paris de ameyî qetilkerdene bi eşkerayîyêke yad kerdî û  nê vatî:

"Ma şexê Sara (Sakîne Cansiz), Rojbîne (Fîdane Dogan) û Ronahî (Leyla Şaylemez) yê ke 9ê çeleyî de Paris de ameyî qetilkerdene de pêro şehîdan bi hurmet yad kenê. Vîrameyîşê înan roşnî danê têkoşînê ma.

Dewleta tirke bi nê qirkerdişî waşt ke hêvîya azadîye ya kurdan, raştîya hêzê cinîyan çin bika. Kurdî nê kiştoxan şinasnenê. Qirkerdişê Parisî bi metodanê gemarinan ê sey ajanîye yê dewleta tirke ame kerdene. No îqtîdar keno ke estbîyayîşê xo bi nê metodanê gemarinan dewam bikero. Hukmatê Fransa vat ke 'ma do berpirsîyaran eşkera bikerê.' La sozê xo nêard ca. Ganî Fransa bi berpirsîyarîye têbigêra û dewleta tirke hukm bika. Heta ke kiştoxê nêrê hukmkerdene ma do têkoşînê xo yê huqûqî ra fek vera nêdê.

Dewleta tirke wexto ke Rayber Apo reyde pêvînayîşî ameyêne kerdene waşt ke bi qetilkerdişê rayberanê têgêrayîşê ma têkoşînê cinîyanê ma çin bika. La no planê tirke nêame meydan. Têkoşînê azadîye yê cinîyan bi tewrbîyayîşê Sarayanê neweyan beno pîlêr. Hukmatê Fransa ganî kiştoxanê Qirkerdişê Parisî hukm biko ke berpirsîyarîya xo bîyaro ca.  Ma venga roşnvîran, demokratan, cinîyan û merdimê wayîrê wîjdanan ê Fransa danê ke kiştoxê Qirkerdişê Parisî bêrê hukmkerdene.

Ma berpirsîyar ê ke tewirê cuya her hîrê embazanê xo bîyarê ca. Ma berpirsîyar ê ke şarê xo qetilkerdişan, qirkerdişan û asîmîlasyonî ra bipawê. Ma berpirsîyar ê ke utopyaya şehîdanê xo bîyarê ca. Wezîfeyê ma yê verênî awankerdişê komelê azadî yê cinîyan û pawitişê nê komelî yê. Ma serrgêra 7. ya Qirkerdişê Parisî de şexsê embazan Sara, Rojbîne û Ronahî de sozê xo yê ke ma dabi şehîdan dibare kenê. Ma embazanê xo Sêvê, Pakîze û Fatma yê ke 2016 de tewrê têkoşînê awankerdişê xoîdarekerdişî bîyî zî reyna bi hurmet yad kenê."