Koordînasyonê PAJKî bi wesîleya serrgêra Qirkerdişê Parisî eşkerayîye daye. PAJKî sere de Sakîne Cansiz, Fîdane Dogan û Leyla Şaylemez yad kerdî û nê vatî:

''Ma sey PAJKî soz danê ke me do heme hêzanê ke nê qirkerdişî de rolê ci esto ra verê tarîxî de hesab bipersê û şexsê hîrê cinîyan ê şorişgêran de qesasê heme cinîya bigêrê. Serra 2022yî de ma do têkoşîno ke bi qerardarîya Sarayan rayra bene de faşîzmê AKP-MHPyî bin bifînê. Hemrayê ma Sakîne, Fîdane û Leyla 9ê çeleyê 2013yî de Pariso ke merkezê modernîteya kapîlastîye yo û xo bi demokrasî û huqûqî wasifeneno de verê çimanê merdimîye de ameyî qetilkerdene. Rixmo ke selahîtedaranê Tirkîya îtîraf kerd ke înan no qirkerdiş plan kerdo bi serran o qirkerdiş nêame roşnkerdene. Bêvengîya Fransa ramojnena ke no qirkerdiş zî sey dewamê komployê vera Rayber Apoyî ame kerdene. Eke Fransa vera qirkerdişî tewir nêgero a zî hemkarê qirkerdişî ya ke pê destê Tirkîya ame kerdene. Ma sey cinîyan ê kurdan vengdayîşê xo newe kenê, wa Fransa vera qirkerdişê ke kiştoxê ci eşkera tewirê xo cade zelal bikero. Wa no bêro zanayene ke ne nê qikerdişî, ne zî hedefgirewtişê ronayoxanê PKK û Têgêrayîşê Azadîye yê Cinîyan ê Kurdan Sakîne Cansiz û wird hemrayanê xo ma sey çîyê ke normal nêvînenê.

Qirkerdişê Parisî polîtîkayanê qirkerdişî yê vera cinîyan û şarê kurdî ramojneno. No qirkerdiş hetê dewleta tirke û paştgêranê ci yê serdestan ra bi waştişê tesfîyekerdişê têgêrayîşê azadîye ame kerdene. Gama ke Rayber Apoyî semedê çareserîya demokratîke cehdkerdene de qirkerdişê hemraya ma Sara mesajêko zaf hetin o. Coka Rayber Apoyî Qirkerdişê Parisî sey Terteleyê Dêrsimî û tewirêkê vera xo hesipna. Bi nê qirkerdişî ame vînayene ke dewleta tirke pîya bi hêzanê mîyanneteweyî herinda averberdişê prosesê çareserî de bi planê çokdayîşî qirkerdişê kurdan wazenê. Bi qetilkerdişê hemraya ma Sara komployê mîyanneteweyî ame newekerdene. Pîya bi Rayber Apoyî serkêşê ronayîşê têgêrayîşî ameyî hedefgirewtene.

Têgêrayîşê ma hêzê xo azadîya cinîyan ra geno. Tersê înano pîl zî xora no yo. Senî ke hemra Sara bêters şîye faşîzmê 12ê êlule ser ewro zî bi hezaran teqîpkarê Sara vera faşîzmê AKP-MHPyî koyanê Kurdîstanî de, zîndanan de û her warê cuye de bi qerardarîya pîle hesab persenê û pêrodayîşê pîlî rayra benê. Cinîyê kurdê rêçê kênaya xoverdayoxe ya Dêrsimî de her cayê Kurdîstanî de vera hêrişî rî bi rî yê. Seba ke paradîgmaya azadîye çîn bikerê hêrişê cinîyan ê serkêşan kenê. Koyanê Kurdîstanî de mîlîtanê têgêrayîşê ma yê serkêşî, Vakur de serkêşê xoverdayîşê  Xoîdarekerdişî, serêkêşê Şorişê Rojawanî, sîyaset û zîndanan de cinîyê wayîrê tewirî, cinîyê welatperwerî netîca nê konseptî de raştê qirkerdiş û şîdetî yenê.

Dewleta tirke û hêzê komplokerî tersê xo yê vera hêzê cinîyan de heqdar ê. Hêzê cinîya azade do miheqeq faşîzm û îqtîdarê dewlete-camêrdî birijno. Şehadetê hîrê cinîyan ê şorişgêrean û heme qirkerdişê bînî yê vera cinîyan dejê ma yo tewr pîl o. Hendê dejê ma hers û îdaya ma yê azadîye zî pîl o. Wa dost û dişmenî pêro bizanê ke têkoşînê ma do ê vera faşîzmî do dewam bikero û komplokeran ra hesab biperso. Ma reyna hemrayanê xo yê bêmergan Sakîne, Rojbîne û Ronahî û şexsê înan de hîrê cinîyan têkoşêran Sevê, Pakîze, Fatma yê ke 4ê çeleyê 2016î de Silopî de ameyî qetilkerdene û heme şehîdanê çeleyî yad kenê. Ma veng danê heme cinîyan, şarê kurdî  û dostanê kurdan ganî semedê hesabpersayîşî vejîyê kuçeyan û têkoşîn û xoverdayîşî pîl bikerê.''