Komîteya Rayberdişî ya PKKyî eşkerayîyêka nuştekîye daye û vat: Her çiqa Qirkerdişê Parisî yê barbarî ser o 7 serrî derbaz bîyî û her çi zelal ê zî edaletê Fransa hema zî hukmkerdiş nêkerd û ceza nêdaye kiştoxan.

Eşkerayîya Komîteya Rayberdişî ya PKKyî wina ya:

"Ma serrgêra 7. ya Qirkerdişê Parisî de yê ke hetê îdareyê Erdoganî ra 9ê çeleyê 2013î de bi hawayêkê palnkerdeyî û rêxistinkerdeyî ame kerdene. Her ca de seba şermezarkerdişê nê  qirkerdişê barbarî û yadkerdişê şehîdan çalakîyî yenê kerdene. Ma nê qirkerdişî şermezar kenê û her hîrê şorişgêranê cinîyan ê şehîdanê ercayeyan ê nê qirkerdişî ronayoxa partîya ma Sakîne Cansiz (Sara), mîlîtana ercaye ya partîya ma embaze Fîdane Dogan (Rojbîne) û Leyla Şaylemez (Ronahî) bi rêzî, heskerdişî û mînetî yad kenê. Ma reyna soz danê ke ma do têkoşînê xo yê azadîye yo ke înan seba ci xo feda kerd, bi xurtî bîyarê ca û serkewtişanê pîlan bivisnê destî.

Her çiqas nê qirkerdişê barbarî ser o 7 serrî vîyartî û her çi eşkera yo zî edaletê Fransa hema zî hukmkerdişêk nêkerd û ceza nêdaye kiştoxan. Fransa bîye qurbana menfaatanê madîyan. Coka ma Fransa seba ke nê qirkerdişî ser o mehkeme nêkerde bi hawayêkê xurtî şermezar kenê. Ma wazenê ke her kes bizano ke hukmnêkerdişê nê qirkerdişî semedanê awanbîyayîşê DAÎŞî ra yew o ke gonîya kurdan, fransizan û merdimîye rijnaye.

Serebûtê Qirkerdişê Parisî mabênê çend mengan de eşkera bî. Ame eşkerakerdene ke kiştox Omer Guneyo ke dima ame tepiştene endamê MÎTê tirkan o û fermanê nê qirkerdişî îdarekarê MÎTî Hakan Fîdan û Erdoganî ra girewt. Berpirsîyarê nê qirkerdişî MÎT  û hukmatê AKPyî bîyî. La îdare û edaletê Fransa na rastîye nêdîye û seba ke Qirkerdişê Parisî ser o hukmkerdişêk nêkerd bîye deyndara kurdan û merdimîye.

Bi na wesîle ganî na rastîye bêra mojnayene: Eke Qirkerdişê Parisî biameyêne hukmkerdene cerganê DAÎŞî bi hawayêkê barbarî zerar nêdayêne merdimîye. Eke kiştoxê Qirkerdişê Parisî biameyêne hukmkerdene dewleta tirke nêbieşkayêne Rojawan îşxal bika û uca de qirkerdişan bika. Eke Qirkerdişê Parisî biameyêne hukmkerdene TC nêbieşkayêne leşkeran bierşawa Lîbya, DYA nêbieşkayêne fuzeyan bierza meydanê teyareyan ser. Eke Qirkerdişê Parisî biameyêne hukmkerdene tecrîdê vera Rayberê Şarê Kurdî Abdullah Ocalanî nêameyêne dewamkerdene. 

Şarê herême û pêro merdimîye bi hêvîya azadîye û demokrasîyî dekewtî serra 2020î. Hêzê ke Rojhelatê Mîyanênî de meseleyan awan kenê û verê krîzan akenê, nika zî bi şerî wazenê ke krîz û kaosî ra derbaz bibê la no mumkîn nîyo. Ma sey şarê kurdan û Rojhelatê Mîyanênî vera şerê dinya yê hîreyînî yê. Ma nêwazenê ke hêzê teberî yê hegemonîkî bi nê hawayî mudaxeleyê Rojhelatê Mîyanênî bikê. Goreyê ma PKK meseleyî bi demokrasîyî çare benê. Ma pare kenê ke sîstemê konfederalîzmê demokratîkî yê paradîgmaya Rayber Apoyî eşkeno nê meseleyan çare bikero. Ma venga pêro bindestan danê ke wa nê sîstemî bişinasnê û muneqeşa bikê.

Eşkera yo ke merdimîye bi şerî dekewte serra 2020î. Tay hêzî wazenê ke menfaatê xo bîyarê ca û ker kes bikewo dima înan. Bêguman PKK û şarê kurdî paştî nêdanê nê hêzan. Ma do bi yewîya şaranê Tirkîya Rojhelatê Mîyanênî de demokrasî aber berê, faşîzmê AKP û MHPyî birişnê, Tirkîya demokratîk bikê û Kurdîstan azad bikê. Ma do têkoşînê xo bi serfîrazîye tacîdar bikê, vîrameyîşê şehîdan bidê ciwîyayene û ma do hedefê înan bîyarê ca.

Nê esasî ser o serrgêra 7. ya şehadetê embazanê ma Sra, Rojbîne û Ronahî û serrgêra şehadetê embazan Rûbare, Halîl û Muratî yê ke 6ê çeleyê 2017î de Herêmanê Pawitişî yê Medya de şehîd bîyî ma înan bi hurmetî yad kenê. Şexsê embaze Sara û Rûbare de ma pêro şehîdanê têkoşînî yê azadîye yad kenê û ma soz danê ke ma do hedefê înan ê Kurdîstanê Azadî û Rayberîya Azade û cuya azade bîyarê ca. Ma vnega pêro embazan, şar û dostanê xo kenê ke wa nêkewê dima hêzanê serdestan wa pêro hêzê xo bidê rijnayîşê faşîzmê AKP û MHPyî ser."