Platformê Cinîyan ê Dêrsimî Meydanê Seyîd Rizayî de eşkerayîyêke daye û bale ante  Îstîsmarê cîncî yo ke Pêrtag de ame kerdene û zafbîyayîşê îstîsmarî ser.

Çalakîya ke xeylêk temsîlkarê partîyanê sîyasîyan û rêxstinanê sivîlan ê komelî, rêxistinê cinîyan û wendakaran û bi seyan hemwelatijî tewrê ci bîyî de cinîyan ra Dîlare Aras qisey kerd. Arase bale ante ke vera cinîyan hêrişo cînsî û şîdet çend şino zêdîyeno vat: ‘‘ Vera domananê kêna û lajan zî hêrişo cînsî zafêr beno. Seba ke Tirkîya de hêrişkarî nînê ceazekerdene vernîya hêrişê cînsî zî abeno û her roje hîna zêdêr benê.‘‘

Arase vîst vîrî ke Dêrsim de 5 aşmanê peyênan 4 qewimîyayîşê hêrişê cînsî  vejîyayî werte û vat: ‘‘ No zî ramojnenoke rewşe senî xirab a. Seba ke hêrişkarî nînê cezakerdene hêrişê cînsî bîyî sîstematîk. Tewr peynî de Pêrtag de tewr tay 15 domanî raştê îstîsmarê cînsî ameyî. 10 serranê de peyênan îstîsmarê vera domanan sera 700 zêdêr bîyo. Ganî vera naye seferberîya komelkîye bêro îlankerdene. Na çarçewe tewr vernî de wa Meclîs de Wezîrîya Domanan bêro ronayene. Deweyanê hêrişê cînsî yê vera cinîyan û qijan de pîya bi hêrişkaran êyê ke naye rê zemîn kenê amade û nê hêrişî nimnenî wa bêrê hukmkerdene û cezayê giranî bêrê dayene.‘‘

Arase waşt ke pîya bi deweya Pêrtagî heme dewayan de wa qerarê nimitîye bêro wedartene û rêxistinanê cinîyan domanan rê bêrê akerdene û vat ma qebûl nêkenê ke nê dewayî peyê beranê guretayan de bêrê vînayene. Ganî şarê ma zî vera nê qewimîyayîşan wirzo payan ser.‘‘ 

Eşkerayîye bi slogananê vera hêrişê cînsî  qedîyaye.