Namzeta HDP’yî ya hemserekîya Şaredarîya Kasrîkî Sosin Bûgdaye va, “Serê de perwerde û weşîye, ma do bi her hawayî xizmeta şarê xo bikerê. Reyna derheqê zîreet û heywankarîye de zî projeyê ma amade yê.”
Şirnex de pêro şaredarîyê merkez, qeza û nahîyeyan rê qayûmî ameyê tayînkerdene û Şirnex nika seba weçînayîşê 31’ê Adare amadekarîya xo keno. Namzeta HDP’yî ya Şaredarîya qezaya Kasrîkî Sosin Bûgdaye vana ma seba wezîfeyî amade yê.
KAR RA AMEYE EŞTENE LA MUCADELEYÊ XO RA DEST VERA NÊDA
Bûgdaye serra 1976’î, qezaya Hezexî de maya xo ra bîya. Serra 1994’î ra heta 2 serranê peyênan Şîrnex de hemşîretîye kerda. Maya 2 domanan a. Bûgdaye vana, “Ez zî bi KHK’yî kar ra ameya eştene. Qet yew sebeb nêmusna û ez kar ra eşta. Naye ser mi zî teber de meslega xo dewam kerde.”
ZEREYÊ HDP’YÎ DE EZ EŞKENA XO ÎFADE BIKA
Bûgdaye 10 serrî yo ke Sendîkaya Kedkaranê Weşîye de xebetiyena. Bûgdaye wina qisey kerd: ”Ez ke kar ra ameya eştene, fikirîya û mi va ez eşkena se bika. Mi HDP hetê feraset û felsefe ra xo rê nêzdî di û seba ke projeyanê xo biyara serê HDP’yî de bîya namzete. Çunke ez xo HDP’yî de baş îfade kena. Ez kedkar a, cinî ya û şarê bindestî ra yew merdim a. Yanê seba ke HDP’yî de ca bigî zaf sebebe mi estê.”
PROJEYÎ AMADE YÊ
Bûgdaye derheqê projeyanê xo de zî wina qisey kerd: “Sere de perwerde û weşîye, ma do bi her hawayî xizmeta şarê xo bikerê. Reyna derheqê zîreet û heywankarîye de zî projeye ma amade yê.”
